Ulan aýdanynda qatty boranda 4 qoıshy evakýatsııalandy - ShQO

ÓSKEMEN. QazAqparat – Shyǵys Qazaqstan oblysy Ulan aýdanynda qutqarýshylar boranda qalǵan 4 baqtashyny evakýatsııalady, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, óńirde 3 kún qatarynan boran soǵyp tur.

«112» nómirine qońyraý shalǵan Ulan aýdanyndaǵy sharýa qojalyǵynyń ıesi qystaqtan qaıta almaı jatqan shopandardy evakýatsııalaý qajettigi týraly aıtqan.

«Oqıǵa ornyna qutqarýshylar dereý «Trekol» jol talǵamaıtyn kóligimen shyqty. Jer bederiniń kúrdeliligi, qarańǵy túsýi jáne qatty soqqan boran jaǵdaıdy qıyndatty. Qutqarýshylar 4 shopandy aman-esen evakýatsııalap, Óskemen qalasyna jetkizdi», - dep habarlady vedomstvo ókilderi.

Osy rette, TJD mamandary óńir jurtshylyǵyna daýyldy eskertý men joldardyń jaǵdaıy týraly «Dármen» uıaly qosymshasynan bilip otyrýǵa bolatynyn eskertedi.