Ulaǵatty ustaz Kúlásh Qunantaıqyzynyń aty ýnıversıtettiń oqý ǵımaratyna berildi
ALMATY. KAZINFORM — Qazaq ulttyq qyzdar pedagogıkalyq ýnıversıtettiń oqý ǵımaratyna Kúlásh Qunantaıqyzynyń aty berilý saltanaty jáne dárishananyń ashylý ótti.
Kúlásh Qunantaeva – Qazaqstan áıelderiniń ishinen shyqqan tuńǵysh pedagogıka ǵylymdarynyń doktory, akademık. Búgin otandyq pedagogıka ǵylymynyń damýyna súbeli úles qosqan kórnekti ǵalym, ulaǵatty ustaz qurmetine «Qazaqstandaǵy bilim salasynda áıelderdiń róli» taqyrybynda konferentsııa ótkizildi. Konferentsııa aıasynda ǵalymnyń ómiri men ǵylymı qyzmeti jóninde baıandama jasaldy.
«Kúlásh Qunantaıqyzy – meniń ǵylymı jetekshim. Uzaq ýaqyt boıy janynda júrip, bilimmen sýsyndadym. Elge belgili tulǵanyń qasynda júrip, ǵylymnyń qyr-syryn meńgerý – men úshin úlken dáreje. Ustazymnyń adamı bolmysyna tántimin. Bizdi tek maman retinde ǵana emes, tulǵa retinde qalyptasýymyzǵa da óziniń úlken úlesin tıgizdi. Kúlásh Qunantaıqyzy salǵan izben men de búgin shákirt tárbıeleýdemin. Kúlásh Qunantaeva – meniń ǵylymdaǵy anam. Jetken jetistikterim ustazymnyń eńbeginiń jemisi dep bilemin. Eńbegin elep, esimin ulyqtap jatqan Ýnıversıtet basshylyǵyna aıtar alǵysym sheksiz», – dedi pedagogıka ǵylymdarynyń doktory, L.N.Gýmılev atyndaǵy Eýrazııa ulttyq ýnıversıteti professory Seıitqazy Perızat Baıteshqyzy.
Sondaı-aq is-shara barysynda Qazaqstan Respýblıkasynyń Ulttyq ǵylym akademııasynyń jáne QR Pedagogıka ǵylym akademııasynyń qurmetti akademıginiń jetistikteri, fotosýretteri, qujattary men ǵylymı jumystary usynylatyn kórme uıymdastyryldy. Ýnıversıtet rektory Gúlmıra Qanaı Kúlásh Qunantaıqyzynyń qazaq áıelderiniń joǵary bilim alýy jolynda sińirgen eńbegi zor ekenin atap ótti.
«Kúlásh Qunantaıqyzynyń qazaq áıelderiniń joǵary bilim alýy jolynda sińirgen eńbegi zor. Ol kisiniń tikeleı yqpalymen áıelder biliminiń damýy jáne Qazaqstanda bilim berýdi damytý týraly 400-den asa ǵylymı eńbegi jaryq kórdi. Onyń ishindegi oqý quraldary men oqýlyqtar jáne monografııalar bar. Kúlásh Qunantaevanyń jetekshiligimen ǵylym kandıdattary men doktorlar daıyndaldy. Qazirgi kúnde de «Qunantaevanyń ǵylymı mektebi» sabaqtastyǵy saqtalǵan», – dedi rektor.
Shara sońynda úlgerimi úzdik jáne qoǵamdyq belsendiligimen erekshelengen Qazaq ulttyq qyzdar pedagogıkalyq ýnıversıtetiniń 4 stýdentine 3 mıllıon teńge kóleminde ulaǵatty ustaz Kúlásh Qunantaeva atyndaǵy bilim granty saltanatty túrde tabystaldy. Áleýmettik jaýapkershilik aıasynda «Almaty Clinic» ortalyǵy stýdentterge QyzPU-dyń 80 jyldyq mereıtoıyna oraı demeýshilik kómek kórsetti.
Grant ıegeri atanǵan «Shet tili: eki shet tili» mamandyǵynyń 3 kýrs stýdenti Aınur Begalıeva óziniń qýanyshymen bólisti.
«Men búgin Kúlásh Qunantaıqyzy atyndaǵy grantqa ıe boldym. Qýanyshymda shek joq. Bul – meniń bilimge degen talpynysymdy arttyra tústi. Aldaǵy ýaqytta budan da jaqsy oqýǵa tyrysamyn. Osyndaı múmkindik syılaǵandaryńyzǵa alǵysym sheksiz!», – dedi stýdent.
