Ýltraóńdelgen taǵam erte ólimge ákeledi - zertteý
«Frantsııa men Ispanııada júrgizilgen zertteý ýltraóńdelgen ónimder artyq tamaqtanýǵa sebep bolatynyn anyqtady. Ǵalymdar mundaı ónimder erte ólimge alyp keletinin aıtyp, alańdaýshylyq bildirdi» dep jazady basylym.
Avtordyń jazýynsha, ýltraóńdelgen taǵam óndiristik qaıta óńdeýden ótkizilgen ónimderdiń klassıfıkatsııasy sanalady.
«Eń tómengi kategorııa - óńdelmegen nemese az óńdelgen taǵamdar. Oǵan jemister, kókónister, sút, et, jumyrtqa men burshaqty taǵamdar jatady. Al óńdelgen taǵamdar saqtalý merzimin uzartý nemese dámin ózgertý úshin tuz, qant, maı men fermentter paıdalaný arqyly jasalǵan. Bul kategorııaǵa irimshik, nan, konservilengen jemister men kókenister, qaqtalǵan balyq, syra jatady. Odan keıingi satyda ýltraóńdelgen ónimder tur. Bul óndiristik qaıta óńdeýde ótken, ónim syrtynda kóp ıngredıentter jazylyp turǵan taǵamdar» dep jazady avtor.
Navarra ýnıversıtetiniń professory Maıra Bes-Rastrollonyń aıtýynsha, quramynda bes ıngredıentten kóp tizim bolsa, ol ýltraóńdeýden ótken ónim sanalady. Bul qatarǵa óńdelgen et, pıtstsa, jyldam daıyndalatyn sorpa, shujyqtardy jatqyzýǵa bolady.
«Ispanııadaǵy Navarra ýnıversıteti júrgizgen zertteýde ǵalymdar on jyl boıy 19 899 adamnyń tamaqtaný ratsıonyn baqylaǵan. Zertteý barysynda 335 adam kóz jumǵan. Olardyń kóbi óńdelgen tamaqtardy tutynǵany anyqtalǵan. Parıj ýnıversıteti júrgizgen ekinshi zertteýde bes jyl boıy 105 159 adamnyń tamaqtanýy baqylanǵan. Bul zertteý nátıjesinde ýltraóńdelgen tamaq tutynatyndardyń júregi aýyratyny belgili boldy» dep jazady basylym.
Al Parıj ýnıversıteti professory Matılda Týveniń aıtýynsha, álem boıynsha ýltraóńdelgen tamaqty tutyný kórsetkishi artyp barady. Sondaı-aq mundaı ónimderdiń júrek qantamyrlary aýrýyn týǵyzatynyna da dálelder kóptep keltirilýde.