2026 jyly UQShU Bas hatshysy Qyrǵyz Respýblıkasynyń ókili bolady
ASTANA. KAZINFORM — Memleket basshysy Qasym-Jomart Toqaev resmı delegatsııa múshelerimen birge UQShU Ujymdyq qaýipsizdik keńesiniń keńeıtilgen quramdaǵy otyrysyna qatysty. Bul týraly Aqordanyń baspasóz qyzmeti habarlady.
Qazaqstan, Belarýs, Qyrǵyzstan, Reseı jáne Tájikstan kóshbasshylary Uıymǵa múshe elderdiń ujymdyq qaýipsizdigin qamtamasyz etýdiń ózekti máselelerin qarastyryp, bıylǵy UQShU jumysynyń negizgi baǵyttaryn qorytyndylady. Sondaı-aq aldaǵy kezeńge arnalǵan basymdyqtardy anyqtady.
Prezıdentter UQShU Bas hatshysy laýazymyndaǵy qyzmetin aıaqtap jatqan Imanǵalı Tasmaǵambetovke alǵys aıtty.
Jıyn barysynda 2026 jylǵy 1 qańtardan bastap UQShU Bas hatshysy qyzmetine úsh jyl merzimge Qyrǵyz Respýblıkasynyń ókili Taalatbek Masadykovty taǵaıyndaý týraly sheshim bekitildi.
Otyrys qorytyndysy boıynsha Ujymdyq qaýipsizdik keńesiniń deklaratsııasy qabyldandy. Sondaı-aq Uıymǵa múshe memleketterdiń múddesine saı ujymdyq qaýipsizdik júıesin jan-jaqty jetildirýge baǵyttalǵan birqatar qujatqa qol qoıyldy.
Prezıdent UQShU Ujymdyq qaýipsizdik keńesiniń shaǵyn quramdaǵy otyrysyna qatysqanyn jazǵan edik.
Eske sala keteıik, keshe Prezıdent UQShU keńesiniń otyrysyna qatysý úshin Bishkek qalasyna bardy.
Búgin Memleket basshysyn «Yntymak Ordo» rezıdentsııasynda Sadyr Japarov kútip aldy.
Artynsha UQShU Ujymdyq qaýipsizdik keńesiniń otyrysy bastaldy.