UQShU: Terrorızmge qarsy is-qımyl týraly Qazaqstannyń zań jobasy qabyldandy
MÁSKEÝ. KAZINFORM — Qazaqstan Parlamentiniń delegatsııasy Ujymdyq qaýipsizdik týraly shart uıymy Parlamenttik Assambleıasy Keńesiniń birlesken otyrysyna jáne XVIII jalpy otyrysyna qatysty. Delegatsııany Májilis tóraǵasy Erlan Qoshanov bastap bardy.
Otyrys barysynda UQShU PA Keńesiniń qatysýshylary Assambleıanyń osy jylǵy qyzmetin qorytyndylady. Parlamentshiler Uıymǵa múshe memleketterdiń zańnamalaryn úılestirý jáne damytý boıynsha belsendi jumys atqardy. Ártúrli baǵytta qaýipsizdikti nyǵaıtýǵa arnalǵan jańa modeldik zańdar men usynymdardy qabyldaý jóninde josparly jumys júrgizildi. Olardyń qatarynda esirtki bıznesimen, kıberqylmyspen, transulttyq terrorızmmen, adam saýdasymen, qarýdy zańsyz taratýmen jáne basqa da qylmys túrlerimen kúres máseleleri bar.
Óz sózinde Erlan Qoshanov Ujymdyq qaýipsizdik týraly shart uıymy Parlamenttik Assambleıasyjahandyq jáne óńirlik syn-qaterlerge jedel ári tıimdi túrde jaýap berip, Uıymǵa múshe barlyq eldiń múddelerin eskerip, sheshimder qabyldanýyn qamtamasyz etip otyrǵanyn erekshe atap ótti. Sondaı-aq depýtattar ortaq tarıhty saqtaý baǵytynda belsendi ári júıeli jumys júrgizip jatyr. Osy turǵyda 2025 jyly UQShU elderindegi basty oqıǵa – Uly Jeńistiń 80 jyldyǵyn atap ótý boldy.
Budan bólek, Májilis spıkeri geosaıası turaqsyzdyqqa qaramastan, bıyl halyqaralyq deńgeıde qabyldanǵan birqatar mańyzdy sheshimge nazar aýdardy. Olar – Ázerbaıjan men Armenııa arasyndaǵy qaqtyǵystyń rettelýi, Gaza sektorynda bitimge kelý týraly kelisimge qol qoıylýy, Qyrǵyzstannyń ıAdrolyq qarýǵa tyıym salý týraly shartqa qosylýy, sondaı-aq Aýǵanstan men Pákistan shekarasynda atysty toqtatý jóninde kelisimge qol jetkizilýi.
Erlan Qoshanov Qazaqstannyń aýǵan halqyna qoldaý kórsetýge baǵyttalǵan kúsh-jigeri týraly da aıtty. Bıyl Qazaqstan Aýǵanstanǵa 2 500 tonnadan astam gýmanıtarlyq júk jóneltti, onyń ishinde azyq-túlik, kúndelikti qajet zattar jáne dári-dármek bar. Ol UQShU elderiniń parlamentshilerin Almatyda ornalasqan BUU-nyń Ortalyq Azııa men Aýǵanstanǵa arnalǵan Óńirlik ortalyǵynyń áleýetin halyqaralyq kómekti úılestirý maqsatymen belsendi paıdalanýǵa shaqyrdy.
Kezdesý barysynda qatysýshylar birqatar modeldik zań men usynymdardy, sonyń ishinde Qazaqstan tarapy daıyndaǵan «Terrorızmge qarsy is-qımyl týraly» zańdy qabyldady. Ol terrorızmge qarsy is-áreket salasyndaǵy memlekettik organdardyń ózara baılanysyn, yqtımal terrorıstik shabýyl nysandaryn qorǵaý sharalaryn, terrorızmge qarsy operatsııalardy júrgizý sharttaryn jáne basqa da máselelerdi retteıdi.
Sondaı-aq Uıymǵa múshe memleketterdiń azamattyq qorǵanys, aqparattyq qaýipsizdik jáne basqa da salalardaǵy zańnamasyn jetildirýge qatysty usynystar qaraldy.
Kezdesý qorytyndysy boıynsha parlamentshiler Damýshy kóppolıarly álemde halyqaralyq qaýipsizdikti qamtamasyz etý týraly málimdeme qabyldady.
Máskeýde ótken UQShU PA is-sharalary aıasynda parlamenttik delegatsııalardyń basshylaryn Reseı prezıdenti Vladımır Pýtın qabyldady.
2026 jyldyń 1 qańtarynan bastap UQShU tóraǵalyǵy Reseı Federatsııasyna ótedi.