UQShU Syrtqy ister mınıstrleri Qazan qalasynda bas qosady
ASTANA. KAZINFORM — 10 maýsymda Qazan qalasynda (Reseı Federatsııasy) Ujymdyq qaýipsizdik týraly shart uıymy Syrtqy ister mınıstrleri keńesiniń kezekti otyrysy ótedi. Bul týraly QR SІM resmı ókili Erlan Jetibaev málimdedi.
Qazaqstan delegatsııasyn QR Syrtqy ister mınıstri Ermek Kósherbaev basqarady.
— Kezdesýde syrtqy ister vedomstvolarynyń basshylary halyqaralyq jáne óńirlik qaýipsizdik, sondaı-aq UQShU jaýapkershilik aımaǵyndaǵy qazirgi syn-qaterler men qaýipter boıynsha pikir almasady. Otyrys qorytyndysy boıynsha birqatar saıası málimdeme men qujattardy qabyldaý, onyń ishinde 2030 jylǵa deıingi UQShU-nyń Terrorızmge qarsy strategııasynyń jobasyn maquldaý josparlanyp otyr, — dedi Erlan Jetibaev Astanada ótken aptalyq brıfıngte.
Onyń aıtýynsha, Qazaqstan tarapynan bul jıynǵa qatysý UQShU aıasyndaǵy yntymaqtastyqty odan ári damytýǵa jáne ujymdyq qaýipsizdik júıesin nyǵaıtýǵa yqpal etedi.
Buǵan deıin Máskeýde UQShU qaýipsizdik keńesteri hatshylarynyń kezekti otyrysy ótken edi.
