UQShU Syrtqy ister mınıstrleri Almatyda birqatar qujatqa qol qoıdy
ALMATY. KAZINFORM – Almatyda UQShU Syrtqy ister mınıstrleri keńesiniń otyrysy boldy. Jıynǵa Qazaqstan Premer-mınıstriniń orynbasary – Syrtqy ister mınıstri Murat Nurtileý tóraǵalyq etti.
– UQShU búginde ujymdyq qaýipsizdikti qamtamasyz etýge baǵyttalǵan tıimdi jáne suranysqa ıe halyqaralyq qurylym retinde áreket etedi. Jańa ǵana shaǵyn quramda áriptestermen halyqaralyq pen óńirlik ahýaldyń damý tendentsııalaryn jáne onyń UQShU-ǵa múshe memleketterdiń qaýipsizdigine áserin jan-jaqty talqyladyq. Pikir almasý ózekti syn-qaterler men ujymdyq qaýipsizdik qaterleriniń jolyn kesýge bárimiz múddeli ekenimizdi kórsetti, - dedi Murat Nurtileý.
Sondaı-aq Qazaqstan premer-mınıstriniń orynbasary – syrtqy ister mınıstri óz sózinde Aýǵanstan men Taıaý Shyǵystaǵy ahýalǵa toqtalyp ótti. Onyń aıýtynsha, Taıaý Shyǵystaǵy daǵdarystyń jalǵyz sheshimi – Palestına memleketin qurý.
– Aýǵanstan men Taıaý Shyǵystaǵy ahýaldyń qazirgi jaǵdaıy men damý perspektıvalary boıynsha baǵalaýlar salystyryldy. Kópjyldyq qaqtyǵystyń jalǵyz sheshimi Shyǵys Ierýsalımde astanasy ornalasqan 1967 jylǵy shekarada Palestına memleketin qurý ekenine senimdimiz. Jalpy, BUU Jarǵysy men halyqaralyq quqyqtyń jalpyǵa birdeı tanylǵan normalary negizinde barlyq daýlardy beıbit jolmen sheshýge shaqyramyz, - dep atap ótti Murat Nurtileý.
Jıyn barysynda UQShU bas hatshysy Imanǵalı Tasmaǵambetovtiń bastamasymen birqatar qujatqa qol qoıyldy. Olar:
– Ǵarysh keńistigin beıbit maqsatta paıdalaný jóninde málimdeme;
– Aqparattyq qaýipsizdik salasyndaǵy yntymaqtastyq máseleleri boıynsha málimdeme;
– Taıaý Shyǵys pen Soltústik Afrıkadaǵy jaǵdaı týraly málimdeme;
– Belarýsııanyń natsıstik basqynshylardan azat etilýiniń 80 jyldyǵyna arnalǵan málimdeme;
Sondaı-aq UQShU SІM mınıstrleri 2013 jyldan beri atqarylyp kele jatqan UQShU-nyń tájik-aýǵan shekarasyn nyǵaıtý jónindegi maqsatty memleketaralyq baǵdarlamany bekitti.
Jıyn aıaǵynda kelesi otyrystyń ýaqyty belgilendi. UQShU SІM keńesiniń kelesi otyrysy bıyl qarasha aıynda UQShU Ujymdyq Qaýipsizdik Keńesiniń sessııasy qarsańynda Astanada ótedi.
Eske salaıyq, buǵan deıin Almatyda UQShU Syrtqy ister mınıstrleriniń otyrysy bastalǵanyn jazǵan edik.
