UQShU sheńberinde arnaıy jasaqtarǵa arnalǵan tehnıkalar jeńildetilgen tártippen jetkiziletin bolady - Májilis

ASTANA. 15 qańtar. QazAqparat - Búgin Parlament Májilisiniń jalpy otyrysynda palata depýtattary «2007 jylǵy 6 qazandaǵy Ujymdyq qaýipsizdik týraly shart uıymyna múshe memleketterdiń quqyq qorǵaý organdary men arnaıy qyzmetterin jaraqtandyrý úshin arnaıy tehnıka men arnaıy quraldardy jetkizýdiń jeńildikti sharttary týraly kelisimge ózgerister engizý týraly hattamany ratıfıkatsııalaý týraly» zań jobasy maquldandy.

Hattamaǵa 2010 jylǵy 10 jeltoqsanda Máskeý qalasynda Armenııa, Belarýs, Qazaqstan, Qyrǵyzstan, Tájikstan, Reseı memleketteriniń basshylary qol qoıǵan. Qazirgi ýaqytta hattamany Qazaqstannan basqa uıym memleketteriniń barlyǵy ratıfıkatsııalaǵan. «Qujatpen Hattamanyń rásimdelgen baptaryna tıisti ózgerister engizilgen bolatyn. Atap aıtqanda, kelisimdi ózektendirý týraly bastamany Reseı tarapy kótergen. Al hattamany qabyldaý teris áleýmettik-ekonomıkalyq jáne quqyqtyq saldarǵa ákep soqtyrmaıdy, bıýdjetten qosymsha qarajatty qajet etpeıdi», - deıdi Іshki ister mınıstri Qalmuhanbet Qasymov. Toqtala ketetin jaıt, Hattama boıynsha Kelisimge quqyq qorǵaý organdary men arnaıy jasaqtarǵa arnalǵan tehnıka men quraldardy jeńildikti sharttarmen jetkizýdi júzege asyrý kezinde shyǵystardy erkin aıyrbastalatyn valıýtamen de, Reseı rýblimen de tóleý múmkindigi usynylady.