UQShU sammıti kezinde 4 myńnan astam polıtsııa qyzmetkeri tártipti qamtamasyz etedi

BІShKEK. KAZINFORM – Qyrǵyzstan astanasynyń polıtsııasy Reseı prezıdenti Vladımır Pýtınniń memlekettik sapary jáne 25-27 qarasha aralyǵynda ótetin Ujymdyq qaýipsizdik týraly shart uıymynyń sammıti kezinde qyzmet kórsetýdiń kúsheıtilgen rejımine aýystyryldy, dep habarlaıdy Kazinform menshikti tilshisi.

Qyrǵyz Respýblıkasy ІІM málimetinshe, memlekettik deńgeıdegi is-sharalar kezinde qoǵamdyq tártipti saqtaý jáne jol qaýipsizdigin qamtamasyz etý, sondaı-aq yqtımal tótenshe jaǵdaılar kezinde jedel áreket etý úshin Bishkek jáne Shý garnızondarynan 4 myńnan astam qyzmetkeri tartyldy.

Bishkek merııasynda atap ótkendeı, 25-27 qarasha aralyǵynda el astanasynyń ortalyq kóshelerinde jáne resmı delegatsııa baǵyttarynda kólik quraldaryna ýaqytsha shekteýler qoldanylady. Osy kúnderi eki iri bazar – «Osh bazary» saýda-oıyn saýyq ortalyǵy jáne «Sary-Ozon» bazary sanıtarlyq tazalaý jumystaryna jabylady.

Kólik keptelisin azaıtý úshin qaladaǵy mektepter men ýnıversıtetter ýaqytsha onlaın oqytýǵa aýystyryldy.

Buǵan deıin 27 qarashada Bishkekte Qyrǵyzstannyń tóraǵalyǵymen Ujymdyq qaýipsizdik týraly shart uıymynyń Ujymdyq qaýipsizdik keńesiniń kelesi sessııasy ótetinin jazǵan edik.

26-27 qarasha kúnderi Memleket basshysy Qasym-Jomart Toqaev UQShU Ujymdyq qaýipsizdik keńesiniń otyrysyna qatysý úshin Bishkek qalasyna barady.