UQShU Parlamenttik Assambleıasynyń baıqaýshylary saılaýǵa daıyndyq barysymen tanysty

NUR-SULTAN. QazAqparat - Senatta Parlament joǵary Palatasy tóraǵasynyń orynbasary Asqar Shákirov Ujymdyq qaýipsizdik týraly shart uıymy Parlamenttik Assambleıasynyń baıqaýshylar delegatsııasymen kezdesti, dep habarlaıdy QazAqparat QR Parlamenti Senatynyń baspasóz qyzmetine silteme jasap.

Tóraǵa orynbasary halyqaralyq baıqaýshylardy Parlament Májilisi men jergilikti ókildi organdardyń depýtattaryn saılaýǵa daıyndyq barysymen tanystyrdy.

«Qazaqstan saılaý protsesin jalpyǵa birdeı qabyldanǵan halyqaralyq standarttarǵa, onyń ishinde Kopengagen qujattarynyń erejelerine sáıkes uıymdastyrý úshin barlyq qajetti sharalardy qamtamasyz etýde. Ol úshin bizdiń elimizde júrgizilip jatqan saıası jáne ekonomıkalyq ózgerister qamtylǵan berik negizder bar. Koronavırýs pandemııasynyń eleýli zardaptary Qazaqstannyń aldyna túbegeıli jańa mindetter qoıdy, sondyqtan aldaǵy parlamenttik saılaý barlyq bılik organdarynyń turaqty jumysyn qamtamasyz etýde jáne aıtylǵan zardaptardy eńserýde asa mańyzdy», - dedi A.Shákirov.

Sondaı-aq Qazaqstannyń Parlamenttik Assambleıa jumysyna belsendi qatysyp kele jatqany atap ótildi.

Senat depýtattary beıne konferentsııa baılanysy tártibinde ótken UQShU PA-nyń barlyq sharalaryna qatysýda.

UQShU Parlamenttik Assambleıasynyń delegatsııasy óz kezeginde saılaý úderisterin jetildirý men saıası jańarý salasyndaǵy reformalar jónindegi Qazaqstannyń qyzmetin joǵary baǵalady.

Taraptar kezdesý sońynda Uıym aıasyndaǵy jumystyń qorytyndylary men aldaǵy josparlar týraly pikir almasty.

Kezdesýge UQShU PA Qazaqstan Respýblıkasy Parlamentiniń ýákiletti ókili Vıktor Rogalev qatysty.