UQShU parlamentshileri esirtki jáne kıberqylmysqa qarsy birlesken sharalardy talqylady
ASTANA. KAZINFORM – Májilis tóraǵasy Erlan Qoshanov bastaǵan Qazaqstan Parlamentiniń delegatsııasy Ujymdyq qaýipsizdik týraly shart uıymy Parlamenttik Assambleıasy keńesiniń otyrysyna qatysty. Jıyn Qyrǵyz Respýblıkasynyń astanasy Bishkek qalasynda ótti.
Іs-shara bastalar aldynda Qyrǵyzstan Prezıdenti Sadyr Japarov Parlament delegatsııalarynyń basshylaryn qabyldady. Ol UQShU Parlamenttik Assambleıasynyń Uıym qyzmetin zańnamalyq turǵyda qoldaýdaǵy rólin joǵary baǵalap, otyrystyń tabysty ótýin tiledi.
Erlan Qoshanov UQShU Parlamenttik Assambleıasy Keńesinde sóılegen sózinde Jogorký Kenesh tóraǵasy Nýrlanbek Shakıevke 2025 jyly Qyrǵyz Respýblıkasynyń Uıymǵa tóraǵalyǵy aıasyndaǵy basymdyqtardy jemisti júzege asyrýyna tilektestik bildirdi.
Qazaqstan delegatsııanyń basshysy áriptesteriniń nazaryn UQShU-ǵa múshe elderde esirtkiniń zańsyz aınalymy men ınternet alaıaqtyqtyń ósýine aýdardy. Ol mundaı jahandyq qaýip-qaterlerge qarsy zańnamalyq tosqaýyl qoıý úshin kúsh biriktirýge shaqyrdy. Májilis tóraǵasy mıllıondaǵan adam osy qylmystyń qurbanyna aınalatynyn, al uıymdastyrýshylary kóbine shetelden áreket etetinin atap ótti.
– UQShU Parlamenttik Assambleıasy sıntetıkalyq esirtki men kıberqylmysqa qarsy is-áreket salasynda ortaq quqyqtyq keńistik qurýǵa yqpal ete alady. Qazaqstan depýtattary osy jumysqa belsene atsalysýǵa daıyn. Bul máselelerde bizde burynnan qalyptasqan quqyqtyq tájirıbe bar. Prezıdent Qasym-Jomart Kemeluly Toqaevtyń tapsyrmasy boıynsha esirtki qylmystaryna qatysty jaýapkershilik zańnamalyq turǵyda edáýir kúsheıtildi. Bıylǵy Parlamenttik sessııanyń sońyna deıin ınternet alaıaqtyq úshin de jaýapkershilikti zań júzinde qatańdatýdy josparlap otyrmyz, – dedi Erlan Qoshanov.
Sondaı-aq Májilis tóraǵasy UQShU-ǵa múshe elderdiń depýtattaryn Aýǵanstandaǵy jaǵdaıdy únemi nazarda ustaýǵa shaqyrdy. Onyń aıtýynsha, eldegi ahýal turaqtanyp keledi.
Erlan Qoshanov Qazaqstan tarapynyń Tájikstan men Aýǵanstan shekarasyn nyǵaıtý qajettigi jónindegi ustanymyn bildirdi. Astanadaǵy sammıtte qabyldanǵan UQShU-nyń maqsatty memleketaralyq baǵdarlamasy da osy máseleni sheshýge baǵyttalǵan. Ekinshi mańyzdy mindet retinde spıker Aýǵanstanǵa kómek kórsetý jáne eldegi ózekti gýmanıtarlyq máselelerdi sheshý úshin halyqaralyq kúsh-jigerdi biriktirýdi atap ótti.
Májilis tóraǵasy dál osy maqsatta Almatyda Ortalyq Azııa men Aýǵanstan elderi úshin BUU-nyń Ornyqty damý maqsattary jónindegi Óńirlik ortalyǵy qurylǵanyn eske saldy. Erlan Qoshanov sózin qorytyndylaı kele, ózara qurmet pen senim UQShU Parlamenttik Assambleıasyndaǵy tabysty yntymaqtastyqtyń kepili ekenine nazar aýdaryp, qol jetkizilgen barlyq ýaǵdalastyqtyń tabysty júzege asýyna tilektestik bildirdi.
Іs-shara aıasynda Parlament delegatsııalarynyń basshylary Bishkektegi Jeńis monýmentindegi Máńgilik alaýǵa gúl shoqtaryn qoıý rásimine qatysty.
Aıta keteıik, Qazaqstan men Qyrǵyzstan aqyndary Eýropa tórinde aıtysty.