UQShU-nyń 2026 jylǵa arnalǵan jospary qandaı
MÁSKEÝ. KAZINFORM - Ujymdyq qaýipsizdik týraly shart uıymynyń (UQShU) Daǵdarysqa qarsy áreket etý ortalyǵynda 2026 jylǵy qyzmettiń basym baǵyttary, UQShU Áskerlerimen (Ujymdyq kúshterimen) josparlanǵan birlesken oqý-jattyǵýlar kesheni, sondaı-aq 2025 jyly ujymdyq qaýipsizdik júıesiniń basqarý organdary men kúshteri jáne quralymdaryn birlesip daıarlaý qorytyndylary talqylandy.
UQShU Birikken shtabynyń bastyǵy Andreı Serdıýkov atap ótkendeı, 2025 jyly shtabtyń jumysy qalyptasqan ahýaldy jáne memleketter basshylary men qorǵanys mınıstrleri qoıǵan mindetterdi eskere otyryp quryldy.
Shtabtyń, Hatshylyqtyń, sondaı-aq UQShU-ǵa múshe memleketterdiń múddeli mınıstrlikteri men vedomstvolarynyń jumysy nátıjesinde memleketter basshylary 2026-2030 jyldarǵa arnalǵan UQShU-ǵa múshe memleketterdiń áskerı yntymaqtastyǵyn damytý josparyn bekitti.
Atalǵan qujatta aldaǵy bes jyldyq kezeńge arnalǵan koalıtsııalyq áskerı qurylys is-sharalarynyń kesheni aıqyndalǵan.
Ótken jyly 2025 jylǵa arnalǵan Birlesken daıarlyq jospary tolyq kólemde oryndaldy. Barlyǵy 61 is-shara ótkizildi. Olardyń qatarynda konsýltatsııalar, shtabtyq kelissózder, jeke jáne birlesken shtabtyq jattyǵýlar, oqý-jattyǵýlardyń josparlaryn ázirleý jáne kelisý boıynsha jumys kezdesýleri, ótkizý aýdandaryn barlaý, sondaı-aq birlesken jáne arnaıy oqý-jattyǵýlar bar.
Negizgi is-shara – uıymǵa múshe memleketterdiń múddeli mınıstrlikteri men vedomstvolarynyń jedel toptarynyń qatysýymen Birikken shtab pen Hatshylyqtyń strategııalyq komandalyq-shtabtyq jattyǵýy boldy. Onyń aıasynda daǵdarystyq jaǵdaılarǵa den qoıý sharalarynyń kesheni pysyqtaldy. Atalǵan jattyǵý naýryz aıynda ótti.
Ótkizilgen oqý-jattyǵýlardyń qorytyndysy boıynsha, Reseı Qarýly Kúshterin qoldanýdyń jaýyngerlik tájirıbesin basqarý organdary men Ujymdyq kúshter quralymdaryn daıarlaý úderisine engizý maqsatynda Birikken shtabta ádistemelik usynymdar ázirleý aıaqtaldy. Bul usynymdar Uıymǵa múshe memleketterdiń qorǵanys vedomstvolaryna aǵymdaǵy jyly birlesken oqý-jattyǵýlardy daıarlaý jáne ótkizý barysynda paıdalaný úshin joldanady.
Spıkerdiń aıtýynsha, 2026 jylǵa arnalǵan Birlesken daıarlyq jospary bekitildi, Ujymdyq kúshterdiń ulttyq kontıngentteriniń quramy naqtylandy jáne olardyń jedel óristetilýin josparlaý qujattary aıqyndaldy.
Barlyǵy 60 is-shara ótkizý kózdelgen, onyń ishinde 8 komandalyq-shtabtyq (birlesken) jáne arnaıy oqý-jattyǵý bar:
• naýryzda – Birikken shtab, Hatshylyq, sondaı-aq Uıymǵa múshe memleketterdiń múddeli mınıstrlikteri men vedomstvolary jedel toptarynyń strategııalyq komandalyq-shtabtyq jattyǵýy;
• qyrkúıekte Qazaqstan aýmaǵynda – Ortalyq Azııa óńiriniń Ujymdyq jedel óristetý kúshteri bólimshelerimen «Rýbej-2026» birlesken oqý-jattyǵýy;
• qyrkúıek–qazan aılarynda Reseıde – Ujymdyq jedel den qoıý kúshterimen «Vzaımodeıstvıe-2026» komandalyq-shtabtyq oqý-jattyǵýy, barlaý kúshteri men quraldarymen «Poısk-2026» arnaıy oqý-jattyǵýy, materıaldyq-tehnıkalyq qamtamasyz etý boıynsha «Eshelon-2026» arnaıy oqý-jattyǵýy;
• qazanda Tájikstan aýmaǵynda – «Kobalt-2026» jáne «Skala-2026» arnaıy oqý-jattyǵýlary; Belarýs aýmaǵynda – Bitimgerlik kúshtermen «Nerýshımoe bratstvo-2026» komandalyq-shtabtyq oqý-jattyǵýy jáne radıatsııalyq, hımııalyq jáne bıologııalyq qorǵaý men medıtsınalyq qamtamasyz etý jónindegi birlesken quramamen «Barer-2026» arnaıy oqý-jattyǵýy.
Sondaı-aq strategııalyq komandalyq-shtabtyq jattyǵý barysynda Ujymdyq kúshterdiń barlyq quramdas bólikterin qoldaný máseleleri pysyqtalatyny atap ótildi. Baqylaýshylar retinde Terrorızmge qarsy ortalyqtyń, TMD Shekara áskerleri qolbasshylary keńesiniń úılestirý qyzmetiniń jáne UQShU Parlamenttik Assambleıasy Hatshylyǵynyń ókilderi qatysady.
Strategııalyq jattyǵý barysynda pysyqtalǵan qujattar aldaǵy birlesken oqý-jattyǵýlardyń tujyrymdamalarynyń negizine alynady.
Aıta keteıik, Májiliske UQShU-ǵa qatysty quqyqtyq bazany jetildirý týraly qujattar engizildi.