UQShU qyzmeti eshqashan úshinshi elderge qarsy baǵyttalmaǵan - Reseı Prezıdenti

ASTANA. KAZINFORM — Reseı Prezıdenti Vladımır Pýtın Peterbýrg halyqaralyq ekonomıkalyq forýmy aıasynda halyqaralyq aqparat agenttikteri basshylarymen kezdesý barysynda óńirlik qaýipsizdik máselesine qatysty pikir bildirdi, dep habarlaıdy Kazinform tilshisi.

— Biz UQShU sekildi qorǵanys uıymynyń múshesimiz. Bul qurylym aıasynda qorǵanys mınıstrlikterimiz turaqty ári óte tıimdi jumys istep keledi. Aıta ketetin jaıt — bul qyzmet eshqashan jáne qazirgi tańda da úshinshi memleketterge qarsy baǵyttalǵan emes. Mundaǵy maqsat – tek bizdiń jaýapkershilik aımaǵyndaǵy qaýipsizdikti qamtamasyz etý, — dedi Vladımır Pýtın.

Reseı basshysy Aýǵanstandaǵy ahýalǵa da jeke toqtaldy.

— Bizdi alańdatatyn birqatar faktorlar bar, sonyń ishinde Aýǵanstandaǵy jaǵdaı da. Qazaqstanmen tikeleı shekara joq bolǵanymen, keıbir ózge elderde bar. Burynǵy jyldary sol aýmaqtarda túrli toptardyń kirip ketken jaǵdaılary tirkelgenin bilemiz, — dedi Reseı Prezıdenti.

Aıta keteıik, osy jıynda Qazaqstan men Reseı arasyndaǵy taýar aınalymynyń 95%-ǵa jýyǵy ulttyq valıýtalarmen júzege asyrylatyny aıtyldy.

Buǵan deıin Vladımır Pýtın Iran men Izraıl arasyndaǵy janjaldy sheshýdiń joly týraly aıtty.

Sondaı-aq Qazaqstanmen qarym-qatynasty damytýda eshqandaı qıyndyq joq ekenin jetkizdi.