UQShU-ǵa múshe memleketter iri áskerı oqý-jattyǵýǵa daıyndalýda

ASTANA. QazAqparat - Osy jyldyń 1 qazany men 2 qarashasy aralyǵynda Ujymdyq qaýipsizdik týraly shart uıymyna (UQShU) múshe memleketter «Jaýyngerlik baýyrlastyq-2018» jattyǵýyn ótkizedi, dep habarlaıdy QazAqparat tilshisi.

Búgin Máskeýde Ujymdyq qaýipsizdik týraly shart uıymy Birlesken shtabynyń bastyǵy, general-polkovnık Anatolıı Sıdorovtyń qatysýymen brıfıng ótkizilip, oǵan telekópir formatynda Astana, Bishkek, Mınsk jáne Erevan qosyldy. Brıfıngte sóz sóılegen Anatolıı Sıdorov 1 qazan men 2 qarasha aralyǵynda ótetin «Jaýyngerlik baýyrlastyq-2018» jattyǵýy týraly keńirek aıtyp berdi.

«Ujymdyq qaýipsizdik týraly shart uıymy moıyndalǵan ári qaýipsizdikti qamtamasyz ete alatyn halyqaralyq aımaqtyq uıym bolyp tabylady. Uıymnyń jaýapty aýmaǵynda UQShU kez kelgen qaýipke jedel jaýap bere alatyn qýatty ári áleýetti uıym. «Jaýyngerlik baýyrlastyq-2018» jattyǵýyna baqylaýshylar retinde BUU, Halyqaralyq Qyzyl krest komıtetiniń ókilderi men áskerı baqylaýshylar shaqyryldy. Jattyǵý aıasynda oqý-jattyǵý tapsyrmalaryn birge oryndaý, ulttyq merekelerdi atap ótý, sporttyq saıystar men kontsertterdi uıymdastyrý uıymǵa múshe memleketterdiń áskerıleriniń dostyǵyn nyǵaıta túsedi. UQShU aldaǵy ýaqytta da uıymǵa múshe elderdiń áskerı qaýipsizdigin qamtamasyz ete beretinine senim bildirgim keledi», - dedi Máskeýden tikeleı telekópir formatynda sóılegen Anatolıı Sıdorov.

Qazaqstan, Qyrǵyzstan, Tájikstan men Reseı elderiniń aýmaǵyndaǵy birlesken jedel-strategııalyq oqý-jattyǵý bir aıǵa sozylady. Onyń aıasynda UQShU múshe memleketterdiń Qarýly Kúshteriniń barlaý bólimsheleriniń «Іzdeý-2018» jattyǵýy, Jedel jaýap qatý Ujymdyq kúshteriniń «Ózara is-qımyl - 2018» jattyǵýy, Bitimgerlik Kúshterdiń «Joıylmas baýyrlastyq-2018» jattyǵýy men Ortalyq Azııa aımaǵynyń «Meje-2018» jattyǵýlary biriktirilmek.

Jattyǵý sheńberinde áskerı qaqtyǵystardy sheshý men aldyn alýdyń keshendi sharalary ázirlenetin bolady.