UQShU-ǵa múshe elderde bıyl keshendi oqý-jattyǵýlar ótedi

MÁSKEÝ. QazAqparat – Ujymdyq qaýipsizdik týraly shart uıymynyń Birikken shtabynda 2023 jyly Uıym áskerleriniń (Ujymdyq kúshterdiń) birlesken oqý-jattyǵýlaryn uıymdastyrý jáne ótkizý boıynsha alǵashqy kelissózder ótti, dep habarlaıdy QazAqparat menshikti tilshisi Birikken shtabtyń baspasóz qyzmetine silteme jasap.

28-30 naýryzda ótken kelissózderge Armenııa, Belarýs, Qazaqstan, Qyrǵyzstan, Tájikstannyń múddeli mınıstrlikteri men vedomstvolarynyń, sondaı-aq UQShU Birikken shtaby men Hatshylyǵynyń ókilderi qatysty.

Málim bolǵanyndaı, bıyl Uıym áskerleriniń (Ujymdyq kúshterdiń) keshendi oqý-jattyǵýlary birlesken jedel-strategııalyq «Jaýyngerlik baýyrlastyq» úlgisinde ótkizilmek. Bul – Uıym formatyndaǵy birlesken daıyndyqtyń joǵarǵy úlgisi.

UQShU jaýapkershiligi aımaǵynyń túrli óńirlerinde ujymdyq qaýipsizdik júıesiniń barlyq elementteri qamtylady.

«Jaýyngerlik baýyrlastyq-2023» keshendi jospary aıasyndaǵy birlesken oqý-jattyǵýlarda UQShU Daǵdarystyq áreket etý ortalyǵy men Uıymǵa múshe elderdegi ulttyq organdar basqarý pýnktileri tehnıkalyq quraldarynyń múmkindikteri paıdalanylmaq.

Belarýs aýmaǵynda Uıym áskerleriniń (Ujymdyq kúshterdiń) túrli komponentteriniń daıyndyǵyn biriktiretin birlesken jáne arnaýly oqý-jattyǵýlar josparlanǵan. Sonymen qatar, Belarýste alǵash ret radıatsııalyq, hımııalyq jáne bılogııalyq qorǵanysty birlese qalyptastyrý men medıtsınalyq qamtamasyz etýge baǵyttalǵan «Barer-2023» arnaýly oqý-jattyǵýy ótedi.

UQShU jedel áreket etý ujymdyq kúshteriniń arnaýly baǵyttaǵy kúshterdi qalyptastyrý quramyna engizilgen TJM qurylymdarymen «Skala-2023» oqý-jattyǵýyn ótkizý de josparda.

«Jaýyngerlik baýyrlastyq-2023» birlesken jedel-strategııalyq oqý-jattyǵýlarynyń sońǵy kezeńinde ujymdyq qaýipsizdiktiń ortaazııalyq óńirinde UQShU bitimgerlik kúshteriniń «Berik baýyrlastyq-2023» oqý-jattyǵýyn ótkizý kózdelip otyr. Bul is-shara Qyrǵyzstan aýmaǵynda ótkizilmek. Onyń aıasynda beıbitshilik pen kelisimdi saqtaý maqsatynda UQShU ujymdyq qaýipsizdik júıesiniń kúshteri men quraldaryn qoldana otyryp, bitimgershilik operatsııasy barysynda daǵdarys aımaǵyndaǵy qaqtyǵystardan keıingi retteý mindetteri pysyqtalady.

Jedel jáne jaýyngerlik daıyndyq is-sharalaryn ótkizý kezinde, UQShU ujymdyq qaýipsizdik júıesiniń kúshteri men quraldaryn damytýdyń ózekti máselelerin zertteý maqsatynda qorǵanys vedomstvolary, bazalyq oqý-ádistemelik jáne ǵylymı-zertteý uıymdarynyń ókilderin birikken oqý-jattyǵýlarǵa tartý tájirıbesi jalǵasady.