UQShU elderinen 5 tonnadan astam esirtki tárkilendi
Ujymdyq qaýipsizdik týraly shart uıymyna (UQShU) múshe elder arasynda ótken «Kanal – Granıtnyı bastıon» dep atalǵan operatsııa barysynda quzyrly organdardyń kómegimen 5 036,6 keli esirtki tárkilendi.
UQShU-nyń baspasóz hatshysy Vladımır Zaınetdınovtiń aıtýynsha, sýbaımaqtyq esirtkige qarsy operatsııasy 21-25 maýsym aralyǵynda ótti. Maqsat – ujymdyq qaýipsizdikti qamtamasyz etý, uıymǵa múshe elderde jańa psıhoaktıvti zattar, apıyn men basqa da esirtki túrleriniń taralaýyn boldyrmaý maqsatynda ózara tyǵyz baılanysta jumys isteý.
Operatsııany ótkizý boıynsha halyqaralyq úılestirý shtaby Tájikstan astanasy Dýshanbede ornalasty. Atalǵan is-sharaǵa UQShU-ǵa múshe elderdiń quqyq qorǵaý, shekara qorǵaý, keden qurylymdary, qaýipsizdik qyzmetteri men memlekettik qarjyny barlaý bólimsheleri qatysty.
Aıtýly sharaǵa 14 300-den astam quzyrly organ qyzmetkerleri tartyldy. Tárkilengen esirtkilerdiń ishinde 4,8 keli apıyn, 11 keliden astam gashısh, 3,5 keliden astam geroın, 5 tonnadan astam marıhýana jáne 17 keliden astam sıntetıka esirtki boldy.
Sondaı-aq, 543 esirtki qylmysy, sonymen qatar 3 esirtki satýdan túsetin tabysty zańdastyrý faktisi anyqtaldy. Olar esirtkiden túsken 3,43 mln rýbl tabysty zańdastyrǵysy kelgen. Nátıjesinde 379 adam jaýapqa tartylyp, 83 qarý men 1 276 oq-dári tárkilendi.
Sol sekildi esirtkige qarsy operatsııanyń ótý barysyn birneshe halyqaralyq uıymdar baqylady.
Eske sala ketsek, bıyl naýryz aıynda Memleket basshysy Qasym-Jomart Toqaev Ujymdyq qaýipsizdik týraly shart uıymynyń Bas hatshysy Stanıslav Zasti qabyldady .
Kezdesýde Qasym-Jomart Toqaev uıymnyń aldaǵy damýyna baılanysty birqatar usynystar aıtyp, Qazaqstan tarapynyń UQShU sheńberinde saıası yntymaqtastyqty odan ári nyǵaıtýǵa jáne onyń áleýetin arttyrýǵa daıyn ekenin atap ótti.
