UQShU elderi aýǵan esirtkisine qarsy operatsııa júrgizedi

NUR-SULTAN. QazAqparat – Ujymdyq qaýipsizdik shart uıymy elderi aýǵan esirtkisine qarsy operatsııa júrgizedi. Bul týraly QR Іshki ister mınıstrliginiń resmı ókili Nurdildá Oraz málim etti, dep habarlaıdy QazAqparat tilshisi.

«Qazaqstannyń tóraǵalyǵymen Ujymdyq qaýipsizdik týraly shart uıymyna múshe memleketterdiń esirtkiniń zańsyz aınalymyna qarsy is-qımyl jónindegi quzyretti organdar basshylarynyń úılestirý keńesiniń 23-shi otyrysy ótti. Beınebaılanys arqyly ótken otyrysqa Armenııa, Belarýs, Qazaqstan, Qyrǵyzstan, Tájikstan jáne Reseıdiń esirtkige qarsy qurylymdarynyń basshylary qatysty. Keńes barysynda 2021 jylǵy yntymaqtastyqtyń qorytyndylary shyǵarylyp, odan ári ózara is-qımyldyń joldary belgilendi. Qazaqstannyń ishki ister mınıstriniń orynbasary Arystanǵanı Zapparov óńirdegi «Aýǵan apıyny» eksportynyń ósýi yqtımaldyǵyna baılanysty atalǵan uıymǵa múshe elderdiń qaýipsizdigine tikeleı áser etetin ótkir problemalardyń biri retinde Aýǵanstandaǵy jaǵdaıǵa basa nazar aýdardy»,- dedi Nurdildá Oraz ІІM baspasóz alańynda ótken brıfıng barysynda.

Onyń atap ótýinshe, Ujymdyq qaýipsizdikke múshe memleketterdiń 2021-2025 jyldarǵa arnalǵan esirtkige qarsy strategııasyn iske asyrý barysy talqylandy. «Arna-granıt bastıon» sýbóńirlik esirtkige qarsy operatsııasynyń nátıjelerine joǵary baǵa berildi. Arnaýly operatsııa Ortalyq Azııa elderi arqyly ótetin Aýǵan apıyny tranzıtiniń «soltústik baǵytynda», sondaı-aq Kavkaz-Qara teńiz baǵytynda jáne ujymdyq qaýipsizdikke múshe memleketter shekaralarynyń basqa da ýchaskelerinde ótti.

Birlesken jumys nátıjesinde 773 esirtki qylmysy anyqtaldy. 5,5 tonnadan astam esirtki, onyń ishinde 5 kelige jýyq apıyn, 13 keli gashısh, 12 keli geroın, 5 tonna marıhýana, 22 keliden astam sıntetıkalyq esirtki tárkilendi»,- dedi ol.

Resmı ókildiń atap ótýinshe, aqparattyq-telekommýnıkatsııalyq tehnologııalardy paıdalana otyryp, zańsyz esirtki saýdasyna qarsy birlesip áreket etý jáne Internet jelisinde esirtkini nasıhattaý yntymaqtastyq baǵytynyń biri bolyp aıqyndaldy.

«Sondaı-aq «Kanal» esirtkige qarsy operatsııasynyń úsh kezeńin ótkizý týraly sheshim qabyldandy. Birinshi kezeńi Qyrǵyz Respýblıkasynda Halyqaralyq úılestirý shtabyn ornalastyra otyryp, «Kanal-ekinshi tosqaýyl» degen ataýmen; Ekinshi kezeń Reseı Federatsııasynda «Kanal-Nevskıı qalqan», Úshinshi kezeń Belarýs Respýblıkasynda «Kanal - Neman» degen ataýmen ótkiziledi», - dedi Nurdildá Oraz.