UQShU elderi aımaqtaǵy áskerı-saıası jaǵdaıǵa baılanysty pikir almasady
Mınskide UQShU-ǵa múshe elder aımaqtaǵy áskerı-saıası jaǵdaıǵa baılanysty pikir almasady. Bul týraly Syrtqy ister mınıstrliginiń resmı ókili Aıbek Smadııarov aıtty, dep habarlaıdy Kazinform.
«22 qarashada Mınsk qalasynda Ujymdyq qaýipsizdik týraly shart uıymy Syrtqy ister mınıstrleri keńesiniń, Qorǵanys mınıstrleri keńesiniń jáne Qaýipsizdik keńesteri hatshylary komıtetiniń birlesken otyrysy ótedi. Atalǵan is-sharaǵa Premer-Mınıstrdiń orynbasary – Syrtqy ister mınıstri Murat Nurtileý, Qaýipsizdik Keńesiniń Hatshysy Ǵızat Nurdáýletov jáne Qorǵanys mınıstri Rýslan Jaqsylyqov qatysady. Otyrys barysynda UQShU-nyń Ujymdyq qaýipsizdik aımaqtaryndaǵy áskerı-saıası jaǵdaı jáne sessııaaralyq kezeńdegi uıym qyzmeti týraly pikir almasý josparlanǵan», - dedi Aıbek Smadııarov mınıstrlikten ótken aptalyq brıfıngte.
Onyń atap ótýinshe, otyrysqa qatysýshylar ujymdyq qaýipsizdik júıesin damytýdyń túrli máselesi boıynsha sheshim qabyldaıdy jáne birqatar saıası málimdemeler jasaıdy.
Sondaı-aq Mınsk qalasynda josparlanǵan Ujymdyq qaýipsizdik keńesiniń sessııasy barysynda Memleket basshylarynyń qaraýyna shyǵarylatyn qujattardyń jobalaryn maquldaıdy dep kútilip otyr.
«2024 jylǵy 1 qańtardan bastap uıymǵa tóraǵalyq Qazaqstan Respýblıkasyna ótedi. Sondyqtan Mınskide ótetin birlesken otyrysta M.Nurtileý kelesi jyly osy uıymdaǵy Qazaqstan qyzmetiniń basym baǵyttarymen tanystyrady. Basymdyqtardy qalyptastyrý kezinde qazaq tarapy UQShU qyzmetindegi sabaqtastyqty saqtaýdyń mańyzdylyǵyna negizdeledi. Áriptesterge múshe memleketter úshin neǵurlym ózekti jáne talap etiletin UQShU jumysynyń jarǵylyq baǵyttaryna shoǵyrlaný usynylatyn bolady. Jalpy, Qazaqstannyń basymdyqtaryn UQShU sammıtinde Memleket basshysy resmı túrde usynady», - dedi SІM ókili.
