UQShU bitimgershilik kúshteriniń Qazaqstandaǵy mıssııasy tabysty aıaqtaldy - SІM

NUR-SULTAN. QazAqparat – UQShU bitimgershilik kúshteriniń Qazaqstandaǵy mıssııasy tabysty aıaqtaldy. QR Syrtqy ister mınıstrliginiń Eýrazııalyq ıntegratsııa departamentiniń dırektory Aleksandr Sınıagovskıı osyndaı pikir bildirdi, dep habarlaıdy QazAqparat tilshisi.

«Qazirgi tańda UQShU-nyń Qazaqstan Respýblıkasy bastamasymen elge kelgen bitimgershilik kúshter mıssııasy jumysyn tabysty aıaqtady. 13 qańtardan bastap Qazaqstannyń resmı úndeýi negizinde jáne UQShU-nyń barlyq elderi qol qoıǵan qujatqa sáıkes, UQShU-nyń birikken bitimgershilik kontıngentin kezeń-kezeńimen shyǵarý bastaldy. Bizge kelgen bitimgerler mıssııasyn sátti oryndap, óz elderine oraldy. UQShU ujymdyq kúshteri Ujymdyq qaýipsizdik týraly shartqa qol qoıylǵan kúnnen bastap 30 jyl ishinde alǵash ret jumyldyrylǵanyn atap ótken jón. Qańtar aıynyń basynda qarýly ekstremıster, terrorıster tarapynan qarsy agressııa aktisine tap bolǵan Qazaqstan UQShU-daǵy áriptesterinen qoldaý kórsetý týraly kómek surady», - dedi SІM ókili.

Aleksandr Sınıagovskıı bitimgershilik mıssııany qysqa merzimge ákelýge uıymnyń 1992 jylǵy 15 mamyrdaǵy Ujymdyq qaýipsizdik týraly sharty men 2007 jylǵy 6 qazandaǵy bitimgershilik qyzmet týraly kelisimi, sondaı-aq QaR Prezıdentiniń tıisti úndeýi quqyqtyq negiz bolǵanyn eske saldy.

«Atap aıtqanda, ujymdyq qaýipsizdik týraly sharttyń 4-babynda eger qatysýshy memleketterdiń biri agressııaǵa ushyrasa, uıym ondaı áreketti osy shartqa qatysýshy barlyq memleketterge agressııa retinde qarastyratyny anyq jazylǵan. Agressııa jasalǵan jaǵdaıda barlyq basqa memleketter ótinish boıynsha dereý qajetti kómek, onyń ishinde áskerı kómek beredi», - dep tolyqtyrdy Aleksandr Sınıagovskıı.