UQShU Bas hatshysynyń orynbasarlaryna dıplomatııalyq ımmýnıtet berilýi múmkin

NUR-SULTAN. QazAqparat – Májilis Ujymdyq qaýipsizdik sharty uıymy (UQShU) Bas hatshysynyń orynbasarlaryna dıplomatııalyq ımmýnıtet berýdi maquldady, dep habarlaıdy QazAqparat tilshisi.

Búgin QR Parlamentiniń Májilisi «2002 jyly 7 qazandaǵy Ujymdyq qaýipsizdik týraly shart uıymynyń quqyqtyq mártebesi týraly kelisimge ózgeris engizý týraly úshinshi hattamany ratıfıkatsııalaý týraly» QR Zań jobasyn maquldady.

«Hattamaǵa UQShU múshe memleketterdiń basshylary 2018 jyldyń 8 qarashasynda Astanada qol qoıǵan. Bul ózgerister dıplomatııalyq basymdyqtar men ımmýnıtet berý jolymen uıymnyń Bas hatshysy orynbasarlarynyń áleýmettik qorǵalýyn kóterýge baǵyttalǵan. Sondaı-aq, termınologııany UQShU Jarǵysyndaǵy ózgeristerge sáıkes keltirý maqsatynda Sharttyń ózine túzetýler engizildi. «Ókiletti ókilder» uǵymy «turaqty jáne ókiletti ókilder», «ókiletti ókilder» jáne «turaqty ókilder» sózderine aýystyryldy. 2020 jyldyń 11 aqpanyndaǵy jaǵdaı boıynsha Armenııa, Belarýs jáne Reseı Federatsııasynan ishki memlekettik rásimderdiń saqtalýy týraly habarlamalar alyndy», - dedi QR Syrtqy ister mınıstri Muhtar Tileýberdi QR Parlamenti Májilisinde zań jobasyn tanystyrýda.

Depýtattardyń suraqtaryna jaýap bere otyryp, mınıstr UQShU-nyń turaqty jáne ókiletti ókilderiniń UQShU turaqty keńesiniń jumysyna qatysatynyn jáne óz memleketteriniń ustanymdary men múddelerin qorǵaıtynyn túsindirdi.

Sonymen birge, mınıstrdiń aıtýynsha, rotatsııaǵa sáıkes 2021–2023 jyldary UQShU Bas hatshysynyń orynbasarlarynyń biri Qazaqstan ókili bolady dep kútilýde. Al 2023 jyldan bastap Uıymnyń Bas hatshysy laýazymy da Qazaqstanǵa aýysýy kerek.