UQShU Bas hatshysy Qazaqstanǵa jumys saparymen keledi

MÁSKEÝ. QazAqparat – Bıylǵy jyldyń 9-10 naýryzy kúnderi Ujymdyq qaýipsizdik shart uıymynyń (UQShU) Bas hatshysy Stanıslav Zas Qazaqstanǵa keledi, dep habarlaıdy «QazAqparat» HAA menshikti tilshisi.

UQShU-nyń baspasóz hatshysy Vladımır Zaınetdınovtyń aıtýynsha, sapar barysynda Stanıslav Zas Qorǵanys jáne Syrtqy ister mınıstrlerimen, sondaı-aq QR Qaýipsizdik Keńesiniń hatshysymen kezdesedi.

UQShU-nyń Bas hatshysyn QR Prezıdenti Qasym-Jomart Toqaev ta qabyldamaq.

Kezdesýler barysynda Stanıslav Zas Ujymdyq qaýipsizdik keńesi sessııasynyń sheshimderin (2020 jyeltoqsanynda) júzege asyrý aıasynda josparlanǵan is-sharalar men uıymǵa 2021 jyly tóraǵalyǵy barysynda Tájikstan usynǵan basym baǵyttardy oryndaý jumystary týraly aıtady.

Sonymen qatar, Ortalyq Azııa óńirindegi ujymdyq qaýipsizdikke qatysty, UQShU-na múshe elderdiń syrtqy saıasatyn úılestirý máseleleri sóz bolady. Taraptar sáýir-mamyr aılary aralyǵynda ótetin jarǵylyq organdardyń kezekti májilisterine daıyndyq máselesin talqylaıdy.

Narynbek Ysmaǵulov