UQShU Bas hatshysy Imanǵalı Tasmaǵambetov Qyrǵyzstanǵa keldi

BІShKEK. QazAqparat - Ujymdyq qaýipsizdik týraly shart uıymynyń Bas hatshysy Imanǵalı Tasmaǵambetov Qyrǵyzstan Respýblıkasynyń joǵary saıası jáne áskerı basshylyǵymen kezdesý úshin Bishkek qalasyna keldi, dep habarlaıdy QazAqparat tilshisi.

Qyrǵyzstan Respýblıkasy Prezıdentiniń baspasóz qyzmetiniń habarlaýynsha, sapar barysynda UQShU Bas hatshysy I.Tasmaǵambetov Qyrǵyzstan Respýblıkasynyń Prezıdenti Sadyr Japarovpen kezdesti.

Kezdesýde taraptar aımaqtyq qaýipsizdik pen turaqtylyqty qamtamasyz máselelerin, sondaı-aq uıym ishindegi ózara árekettestiktiń basty baǵyttaryn talqylady.

Qyrǵyzstan prezıdenti Sadyr Japarov Qyrǵyzstannyń aımaqtaǵy qaýipsizdik kepili retinde UQShU aıasyndaǵy yntymaqtastyqqa úlken mán beretinin atap ótti.

Áskerı, aqparattyq jáne gýmanıtarlyq sıpattaǵy sharalardy úılestirý maqsatynda Qyrǵyzstan bıyl óz aýmaǵynda UQShU bitimger kúshterimen birlesip «Myzǵymas baýyrlastyq-2023» oqý-jattyǵýyn ótkizýdi josparlap otyr.

«Ózderińiz biletindeı, azamattardy tartý jáne lańkestik áreketterdi júzege asyrý úshin ártúrli elderdiń ystyq núktelerinde jaýyngerlik jáne dıversııalyq tájirıbe alǵan halyqaralyq terrorıster qaýpi áli de bar. Bul jaǵynan bizdiń elderimiz de qalys qalǵan joq. Osyǵan baılanysty yqtımal destrýktıvti kórinisterge der kezinde den qoıý jáne aldyn alý boıynsha tıisti jumysty kúsheıtý qajet. Óz kezeginde Qyrǵyzstan eldiń qaýipsizdigi men turaqtylyǵyn qamtamasyz etýge baǵyttalǵan tıisti sharalardy qabyldaýda. Bizdiń elimiz UQShU róli men bedelin arttyrýǵa múddeli, onyń uıymǵa múshe memleketterdiń ulttyq qaýipsizdigin qamtamasyz etý úshin jaǵdaı jasaýǵa úlken múmkindikteri bar», - dedi Qyrǵyzstan Respýblıkasynyń basshysy.

UQShU Bas hatshysy I.Tasmaǵambetov Ujymdyq qaýipsizdik týraly shart uıymynyń 2023 jylǵa josparlanǵan baǵdarlamalary men basymdyqtary, sondaı-aq UQShU HQKO-nyń kelesi sessııasyna daıyndyq barysy týraly baıandady.

Sonymen qatar, ol UQShU Ujymdyq qaýipsizdik keńesi sheshimderiniń oryndalý barysy jáne aǵymdaǵy jylǵa arnalǵan jumys jospary týraly aqparat berdi.

Eske salaıyq, Ujymdyq qaýipsizdik sharty uıymyna alty múshe memleket kiredi: Armenııa, Belarýs, Qazaqstan, Qyrǵyzstan, Reseı jáne Tájikstan.

Buǵan deıin habarlanǵandaı, Imanǵalı Tasmaǵambetov bas hatshy qyzmetine 2023 jyldyń 1 qańtarynan bastap 3 jylǵa taǵaıyndaldy.