UQShU aıasynda qupııa aqparattyń taratylǵany úshin qandaı jaza beriledi
ASTANA. QazAqparat - Parlament Senatynyń jalpy otyrysynda «2004 jylǵy 18 maýsymdaǵy Ujymdyq qaýipsizdik týraly shart uıymy sheńberinde qupııa aqparattyń saqtalýyn ózara qamtamasyz etý týraly kelisimge ózgerister engizý hattamany ratıfıkatsııalaý týraly» QR Zańy qabyldandy, dep habarlaıdy QazAqparat tilshisi.
Bul hattamaǵa 2012 jylǵy jeltoqsanda UQShU-ǵa múshe memleketterdiń basshylary Máskeýde qol qoıdy.
Qujattyń negizgi maqsaty UQShU-ǵa múshe memleketterdiń qupııa aqparattyń qorǵalýyn qamtamasyz etý tártibin anyqtaýǵa negizdelgen. Hattamamen engizilgen ózgerister Kelisimge qosylý múmkindigin usynýdy jáne barlyq halyqaralyq quqyq sýbektileriniń onyń tetikterine qatysýyn, Kelisimdi iske asyrý tetiginiń negizgi býyny bolyp tabylatyn ýákiletti organdardyń quramyn naqtylaýdy qarastyrady. Sonymen qatar, ózgerister qupııa aqparattyń taralýyna jol bergen tulǵaǵa qatysty zań quzyretin naqtylaýdy, sondaı-aq aıqyndaıtyn jáne redaktsııalyq sıpattaǵy túzetýlerdi kózdeıdi. Osylaısha, Hattamada eskerilgen barlyq normalar qupııa aqparattyń qorǵalýyn qamtamasyz etýdi aıqyndaýǵa baǵyttalǵan.
«Bul Hattama barlyq múshe memlekettermen ratıfıkatsııalandy jáne kúshine endi. Onyń ishinde sońǵy bolyp naýryz aıynda Qyrǵyzstan qosyldy. Zań jobasy boıynsha barlyq qajetti saraptamalar júrgizildi. Hattamamen engizilgen ózgerister QR Konstıtýtsııasyna jáne zańnamasyna qaıshy kelmeıdi», - dedi QR Ulttyq qaýipsizdik komıteti tóraǵasynyń orynbasary Marat Ósipov.
Depýtattardyń saýaldaryna jaýap berý kezinde M. Ósipov UQShU-ǵa múshe elderde qupııa aqparattyń zańsyz taralýyna qylmystyq jaýapkershilik qarastyrylǵanyn atap ótti. Tek sanktsııalarda aıyrmashylyq bolǵanymen, alaıda bul baǵytta qabyldanatyn qadamdar birdeı.
«Tájikstanda qupııa aqparatty taratqany úshin 10 jylǵa deıin, al bizde 8 jylǵa deıin jaza qarastyrylǵan. Sondyqtan qabyldanatyn qadamdar birdeı, alaıda tıisti ózgeshelikter de bar», - dedi QR UQK tóraǵasynyń orynbasary.
Aıta keteıik, 1992 jyly Ujymdyq qaýipsizdik týraly shartyna qol qoıyldy, al 2002 jyly halyqaralyq uıym UQShU bolyp qaıta quryldy. UQShU-nyń joǵarǵy organy múshe memleketterdiń basshylary kiretin Ujymdyq qaýipsizdik keńesi bolyp tabylady. Ótken jyly birlestikke 25 jyl, al uıymǵa 15 jyl toldy.
