UQShU áskerı jattyǵýy: qazaqstandyq desantshylar arnaıy tapsyrmany sátti oryndady

ASTANA. QazAqparat - Tájikstandaǵy «Harbmaıdon» polıgonynda Ortalyq Azııa óńiriniń jedel óristetý ujymdyq kúshterimen «Shekara-2022» birlesken oqý-jattyǵýy aıaqtaldy. Oǵan Qazaqstannyń áskerı qyzmetshileri qatysty, dep habarlaıdy QR Qorǵanys mınıstrliginiń baspasóz qyzmeti.

Oqý-jattyǵý barysynda Qazaqstannyń Desanttyq-shabýyldaý áskerleriniń bólimsheleri UQShU-ǵa múshe elderdiń áskerı kontıngentteriniń ókilderimen birlesip zańsyz qarýly quralymdardy joıý boıynsha oqý-jaýyngerlik mindetterdi pysyqtady. Áskerı qyzmetshiler beıtanys taýly aımaqta urys is-qımyldaryn júrgizdi.

Qazaqstan men Tájikstannyń rotalyq-taktıkalyq toptarynan turatyn birikken jasaq jaý bólimshelerin qorshaýǵa aldy. Qazaqstandyq desantshylar eldimekenge shabýyl jasap, zańsyz qarýly quralymdarǵa jaýyngerlik mashınalardyń atys qarýynan jáne granata atqyshtardan oq jaýdyryp, shabýyl jasady. Sodyrlar tobyn joıyp, áskerı qyzmetshiler belgilengen shekaraǵa ornyqty.

«Harbmaıdon» polıgonyndaǵy praktıkalyq is-qımyldarǵa Ortalyq Azııa óńiriniń UQShU-ǵa múshe memleketteriniń áskerı kontıngentteri, Birikken shtabtyń jáne uıym hatshylyǵynyń jedel toptary qatysty.

Jattyǵýǵa qatysýshy adamdardyń jalpy sany 1000-ǵa jýyq. Oǵan ushqyshsyz basqarylatyn qurylǵylarmen qosa, 300-den astam áskerı, arnaıy jáne avıatsııalyq tehnıka jumyldyryldy.