UQShU 2021 jyldyń kúzinde bıoqaýipsizdikti qamtamasyz etý jónindegi usynystardy ázirleıdi
Bul týraly búgin UQShU Bas hatshysy Stanıslav Zas «Ujymdyq qaýipsizdik týraly shart uıymynyń jaýapkershilik aımaǵyndaǵy jáne onyń aınalasyndaǵy áskerı-saıası ahýal. UQShU-nyń 2020 jylǵy qyzmetiniń nátıjeleri jáne 2021 jylǵa arnalǵan mindetter» taqyrybynda ótken baspasóz máslıhaty barysynda málimdedi, dep habarlaıdy «QazAqparat» HAA menshikti tilshisi.
Uıymnyń bas hatshysynyń aıtýynsha, 2020 jylǵy oqıǵalar bıologııalyq qaýipsizdik salasyndaǵy qaýip-qaterlerge daıyn bolý kerektigin kórsetip bergen.
Onyń sózinshe, bıologııalyq qaýipterdiń keleshekte paıda bolý yqtımaldylyǵyna tıisti jaýaptar ázirleý qajet.
Osyǵan baılanysty Reseıdiń bastamasymen UQShU sheńberinde osy syn-qaterge qarsy turý úshin tıisti tetik qurý týraly sheshim qabyldandy. Oǵan sáıkes, kúshterdi bólip, olardyń jumys isteýi úshin quqyqtyq negizderdi quryp, mindetterdi belgilep, osy protsesterdi bastap ketý kerek.
«Qazir biz bıologııalyq qaýipsizdik máseleleri boıynsha quzyretti organdar basshylarynyń úılestirý keńesin qurý týraly tıisti ereje ázirlep jatyrmyz. Onda mindetter de, fýnktsıonaldyq múmkindikter de jazylady. Sonymen birge, Qaýipsizdik keńesteri hatshylary komıtetiniń qyzmeti týraly erejege túzetýler engizilýde, olar da qaýiptiń osy túrine qarsy turýǵa baǵyttalady», - dedi Stanıslav Zas.
Onyń sózinshe, jyl saıyn ótkiziletin «Proksı» operatsııasy aıasynda uıymǵa múshe memleketterde bıologııalyq qaýip-qaterge jaýap bererlik áleýet pen kúsh-qýat bar. Atalǵan operatsııa Ujymdyq qaýipsizdik týraly shart uıymyna múshe memleketterdiń arnaıy qyzmetteri men quqyq qorǵaý organdaryna ózara habar bere otyryp, jumys júrgizýge múmkindik beredi.
Ol aldaǵy ýaqytta uıym atalmysh saladaǵy personaldyń daıyndyq deńgeıin arttyrýdy kózdep otyrǵanyn atap ótti.
«Biz osy jyly da, kelesi jyly da osy tártip boıynsha bizdiń memleketterdiń quqyq qorǵaý organdarynyń qyzmetkerleri men arnaıy qyzmetteri úshin tıisti daıyndyqty uıymdastyrýdy kózdep otyrmyz. Sondaı-aq, biz kıberqylmysqa qarsy is-qımyl boıynsha birqatar sharalardy júzege asyrýdy josparladyq», - dedi UQShU Bas hatshysy.
Avtory: Narymbek Ysmaǵulov
