Ýkraınanyń Qazaqstandaǵy Elshisi Petr Vrýblevskıı qyzmetinen bosatyldy

ASTANA. QazAqparat - Ýkraına Prezıdenti Vladımır Zelenskıı Ýkraınanyń Qazaqstandaǵy Elshisin jumystan bosatty, dep habarlaıdy QazAqparat.

Tıisti jarlyq Ýkraına Prezıdentiniń resmı saıtynda jarııalanǵan.

«Petr ıÝrevıch Vrýblevskıı Ýkraınanyń Qazaqstan Respýblıkasyndaǵy Tótenshe jáne Ókiletti Elshisi qyzmetinen bosatylsyn» delingen jarlyqta.

Eske sala keteıik, atalǵan elshi blogerge suhbat bergennen keıin Qazaqstannyń Syrtqy ister mınıstrligine shaqyrylǵan bolatyn.

Syrtqy ister mınıstriniń orynbasary Ermuhambet Qonyspaev Ýkraınanyń Qazaqstandaǵy Elshisi Petr Vrýblevskıımen kezdesti.

«Kezdesý barysynda Elshige bıylǵy 21 tamyzda qazaqstandyq bloger Dıas Quzaıyrǵa bergen suhbatynda aıtqan málimdemelerine baılanysty narazylyq bildirildi. Qazaqstan tarapy mundaı málimdemelerdiń shet memleket elshisiniń qyzmetine saı kelmeıtindigi jáne qolaısyzdyǵy týraly ustanymyn bildirdi. Mundaı is-qımyldar memleketter arasyndaǵy dostyq qatynastarǵa nuqsan keltirmeýge tıis», - delingen QR SІM baspasóz qyzmetiniń málimetinde.

Keıinnen osyǵan qatysty SІM resmı ókili Aıbek Smadııarov pikir bildirdi.

Onyń aıtýynsha, qazirgi ýaqytta Ýkraına Syrtqy ister mınıstrliginen Astanadaǵy jańa elshini taǵaıyndaý týraly ótinish túsken.

«Ýkraına jaǵymen osy másele boıynsha bizde tolyq túsinistik bar jáne eki jaqta da barlyq kelisim oryndalǵan» dedi ol.

Foto: ulysmedia.kz