Ýkraınanyń Harkov qalasynan qazaqstandyq 40 stýdent evakýatsııalanýda

NUR-SULTAN. QazAqparat – Ýkraınanyń Harkov qalasynan qazaqstandyq 40 stýdentti evakýatsııalaý jumysy júrip jatyr. Bul týraly Qazaqstannyń Ýkraınadaǵy elshisi Darhan Káletaev málim etti, dep habarlaıdy QazAqparat tilshisi.

«Harkovten qazaqstandyq 40 stýdent habarlasty. Onda ne bolyp jatqanyn bilesiz be? Naǵyz atys-shabys. Stýdentter maǵan habarlasyp, atys júrip, bomba jarylyp jatyr, qorqynyshty deıdi. Olardy qutqarýdyń 2 amaly boldy. Biri sondaǵy konsýldyqtyń jertólesinde ustaı turý, ekinshi joly Harkovten Lvovqa poezben jetkizý. Biz ekinshi joldy tańdadyq, qazir stýdentter vokzalda. Jáne Sýmy qalasynda 2 azamatymyz bar», - dedi Darhan Káletaev.

Sondaı-aq, elshi azamattardy evakýatsııalaýda kólik baǵasynyń ósip ketkenin aıtty.

«Kıevten Polsha shekarasyna jetkizý úshin 15-20 myń dollar suraıdy. Bizde elshilikte ondaı kólemdegi qarajat joq. Onyń ústine qarjy aýdarylymdary jumys istemeıdi», - deıdi ol.

Buǵan deıin Darhan Káletaev Ýkraına shekarasynda qazaqstandyqtar mingen 4 avtobýstyń kepteliste turǵanyn aıtty.