Ýkraınanyń taǵdyryna qatysty kelisim boıynsha Tramp: ne jaqynda júzege asady, ne eshqashan bolmaıdy

ASTANA. KAZINFORM — Ýkraınaǵa qatysty bir toqtamǵa kelý jónindegi kelisimge jaqynda qol jetkizemiz nemese múlde júzege aspaıdy, dep málimdedi AQSh prezıdenti Donald Tramp Aq úıde Ulybrıtanııa premer-mınıstri Kır Starmermen kezdesýi barysynda, dep habarlaıdy ABC News. 

AQSh prezıdenti kezdesýden keıingi baspasóz máslıhatynda Ýkraınadaǵy qaqtyǵysty toqtatý týraly aıtyp, «biz úlken jetistikterge jettik» dedi.

— Bul ne jaqyn arada bolady, ne múlde bolmaıdy, — dedi Donald Tramp. 

Ol Ýkraınamen paıdaly qazbalardy óndirý boıynsha aldaǵy kelisimdi joǵary baǵalady.

— Bul Ýkraına úshin jáne biz úshin óte jaqsy. Amerıkalyq salyq tóleýshiler endi Ýkraınaǵa kómek pen onyń qorǵanysyna jumsalǵan júzdegen mıllıard dollar úshin ótemaqy alady, bul óz aldyna óte laıyqty is, — dep atap ótti Donald Tramp.

EO-men saýda qatynastaryna toqtalǵan Tramp AQSh-qa qatysty ádiletsiz ekonomıkalyq tájirıbege jaýap retinde Eýropa elderine baj salyǵyn engizý josparyn qaıtalady. Ulybrıtanııaǵa qatysty Tramp naqty jaýap bergen joq. 

— Meniń qaraýym kerek. Aıtaıyn degenim, biz búgin jaqsy pikirtalas ótkizemiz, olardyń jaǵynda óte talantty birneshe adam bar. Meniń oıymsha, biz tarıfter qajet bolmaıtyn naqty saýda kelisimin jasaýǵa jaqsy múmkindik bar, — dep málimdedi Donald Tramp.

Ulybrıtanııa premer-mınıstri «negizinde ozyq tehnologııa bar» jańa ekonomıkalyq kelisim týraly jarııalady. 

— Aıtaıyn degenim, jasandy ıntellekt qaterli isik aýrýyn emdeı alady. Bul bizdiń ǵasyr úshin serpilis bolýy múmkin. Mine, adamdarymyzǵa osylaısha kómektesemiz. Kóptegen múmkindikter bar, — dedi Kır Starmer.

Ulybrıtanııa premer-mınıstri Trampqa korol Karldyń óz eline memlekettik saparmen kelýge jáne brıtandyq memlekettik túski asqa qatysýǵa shaqyrǵan hatyn tabys etti. 

Buǵan deıin Qaýipsizdik keńesi AQSh-tyń Ýkraınaǵa qatysty usynǵan qararyn qabyldaǵanyn jazǵan bolatynbyz.