Ýkraınalyq oftalmolog Túrkistan oblysynda naýqastarǵa kúrdeli ota jasady

TÚRKІSTAN. QazAqparat - Ýkraınanyń tanymal kóz dárigeri Oksana Petrenko Túrkistan oblysynyń ártúrli kóz jaraqatyn alǵan naýqastaryna ota jasady. Kıev qalasynan arnaıy shaqyrylǵan medıtsına ǵylymdarynyń doktory, professor-oftalmolog jergilikti mamandarmen tájirıbe almasyp, sheberlik sabaqtaryn ótkizdi, dep habarlaıdy QazAqparat tilshisi.

Túrkistan oblystyq densaýlyq saqtaý basqarmasynyń uıymdastyrýmen Oblystyq klınıkalyq aýrýhanasynyń bazasynda «Oftalmoplastıka» taqyrybynda eki kúndik sheberlik sabaqtaryn ótkizgen sheteldik maman oftalmologııalyq bólimsheniń tehnıkalyq bazasyn da, jergilikti dárigerlerdiń biliktiligin de joǵary baǵalady. Ol is-sapar barysynda kúıik jaraqatyn alǵan, kóz qýysyna et ósken azamattarǵa kúrdeli 5 ota jasady. Jyl saıyn atalǵan aýrýhana bólimshesinde 2500-ǵa jýyq naýqasqa operatsııa jasaý arqyly emdik sharalar júrgiziledi. Aldaǵy ýaqytta munda jańa qondyrǵylar satyp alynyp, jergilikti dárigerlerdi alys- jaqyn shet memleketterge dáris alýǵa jiberý josparlanyp otyr.

Eske salaıyq, Oksana Petrenko - joǵary bilikti sanatty oftalmolog-dáriger, medıtsına ǵylymdarynyń doktory. A. A. Bogomolts atyndaǵy Ulttyq medıtsına ýnıversıtetiniń oftalmologııa kafedrasynyń dotsenti, Ýkraınanyń oftalmolog-neırooftalmologtary men glaýkomatologtary qaýymdastyǵynyń Kıev bólimshesiniń tóraıymy. Ol glaýkomany lazerlik emdeýdiń qazirgi zamanǵy ádisterin, kóz jas aǵzalary jaraqattary kezinde joǵary tehnologııalyq operatsııalyq aralasýlardy jáne kózdiń qosalqy apparatynda qalpyna keltirý operatsııalaryn meńgergen.