Ýkraınalyq «Golos» shoýyna qatysqan almatylyq qyz eń ǵajaıyp daýys ıesi atandy

ALMATY. QazAqparat - Ýkraınalyq «Golos» shoýynyń tóreshileri 10 jastaǵy almatylyq Danelııa Týleshovany baǵdarlama tarıhyndaǵy eń ǵajaıyp daýys ıesi dep atady, dep habarlaıdy QazAqparat tilshisi.

Jas ánshi Ýkraınadaǵy «Golos» shoýynda amerıkalyq ánshi Demı Lovatonyń «Stone Cold» kompozıtsııasyn oryndap, tóreshilerdi tań-tamasha qaldyrǵan bolatyn.

Alǵashqy sekýndtarda-aq Danelııanyń daýysyna tánti bolǵan tóreshilerdiń tórteýi de birdeı buryldy.

Talantty búldirshinniń ustazy Natalıa Chýrakova baıqaýdyń qalaı ótkeni týraly aıtyp berdi.

Onyń aıtýynsha, Danelııa tańǵy 7-den keshke deıin túsirilim jumystaryna qatysqan. Ol vokalmen 1,5 jyldan beri aınalysady.

«Óte talantty qyz. Danelııa túngi 10 shamasynda sahnaǵa shyqty. Meniń oıymsha, osyndaı ýaqytta óte joǵary dárejede óner kórsetý úshin balanyń daıyndyǵy qandaı bolý kerektigin túsine berińizder. Vokal turǵysynan da, emotsııany da kórsetý kerek. Balamyzdyń talantyn baǵalaǵany kóńil qýantady», - dedi Natalııa Chýrakova.

Danelııa sheteldik óner sahnasyna birinshi ret shyǵyp otyrǵan joq. 2015 jyly «Aıalaǵan Astana» halyqaralyq baıqaýynda - jeńimpaz, «Jańa tolqyn» baıqaýynda kórermen kózaıymy júldesin alǵan bolatyn.