Ýkraınalyq fýtbolshy «Aqjaıyqtyń» namysyn qorǵaıdy

«Aqjaıyq» fýtbol klýbynyń baspasóz qyzmetinen túsken málimetke qaraǵanda, ýkraınalyq jartylaı qorǵaýshy Andreı Tkachýkpen kelisimshartqa qol qoıyldy.

A.Tkachýk Ýkraınanyń Jıtomır qalasynda fýtbol álippesin úırengen. 2004 jyly 23 qarashada osy eldiń birinshi lıgasynda oınaıtyn «Polese» (Jıtomır) komandasynyń quramynda birinshi kezdesýin ótkizdi. Sodan keıin «Karpaty» (Lvov) komandasynda dop teýip, onyń 2006 jyly birinshi lıgada ekinshi oryn alyp, joǵary topqa qosylýyna kómektesti. Ýkraına joǵary lıgasynda alǵash 2007 jyly «Dnepr» - «Karpaty» komandalary arasyndaǵy kezdesýde oınady.  2008 jyldan Lvov komandasynyń negizgi oıynshysyna aınaldy. 2013 jyly jalǵa berý negizinde maýsym aıaǵyna deıin «Arsenal» (Kıev) komandasynda boldy. 2014 jyly «Karpaty» komandasynan qol úzip, «Vorksla» (Poltava) klýbyna qosyldy. 2014 jyldan osy komanda quramynda 73 match ótkizip, úsh gol soqty. Jalpy sporttyq jolynda 226 ret alańǵa shyqqan.

«Komandaǵa jańadan ázirge bir ǵana oıynshy alynyp otyr. 28 qańtar kúni oqý-jattyǵý jıyny márege jetkenge keıin basqa da fýtbolshylardy qarap, bir mámilege keletin bolamyz», dedi «QazAqparat» tilshisine «Aqjaıyq» fýtbol klýbynyń dırektory Nurtaza Ábilhanov.

Aıta keteıik, fýtboldan premer-lıga komandalary arasyndaǵy el birinshiligine daıyndalyp jatqan «Aqjaıyq» komandasynyń bas bapkerligine ýkraınalyq maman Vladımır Mazıar bekitilgen bolatyn.

Oraldyqtar oqý-jattyǵý jıyny barysynda alǵashqy jeńisine qol jetkizdi. Reseı premer-lıgasynda óner kórsetetin «Amkar» (Perm) komandasymen ótken kezdesýdiń birinshi taımynda esep ashylǵan joq. Ekinshi taımda 65-mınýtta komandada synnan ótip júrgen, buǵan deıin Bolgarııa elinde oınap kelgen Erkebulan Nurǵalıevke qarsy tártip buzylyp, 11 metrlik aıyp doby belgilendi. Ony Erkebulannyń ózi dál oryndady. Budan keıin «Amkar» shabýylǵa shyqqanymen, «Aqjaıyqtyń» qorǵanysy syr bergen joq.