Ýkraınalyq aralar Syr boıynda bal jınaıdy
QYZYLORDA. QazAqparat - Tereńózek kentiniń turǵyny Donskoı Nıkolaıdyń omartashylyqpen aınalysqanyna 30 jyldan asypty. Onyń qojalyǵynda qazir Karpat bal arasynyń tuqymy ósirilýde. Bul bal arasy negizinen Ýkraınanyń taýly aımaqtarynda ǵana kezdesedi.
Aýdandyq ákimdiktiń habarlaýynsha, búgingi kúni aýdanda omartashylyq kásippen turaqty aınalysyp kele jatqan 15-ke jýyq ara ósirýshi bar. Nıkolaı Donskoı bal arasynyń ónimdiligin arttyrý maqsatynda Reseı Federatsııasynyń Kıslovodsk qalasynan jańa tuqym túrin aldyrypty. Qazirgi tańda omartashy bal aralarynyń jáshikterin syrlap, kóktemgi maýsymǵa ázirlik ústinde. Syr óńiri shóleıtti aımaq bolyp keletindikten Karpat bal arasyna qolaıly. Olar kóktemde sheńgel men jantaq gúlderinen bal jınasa, jaz aılarynda darııa boıyndaǵy ártúrli gúlderden óz ónimin alady.
«Bul qyzyqty kásiptiń qıynshylyqtary da joq emes. Bal arasyn túrli aýrýlardan qorǵaý sharalary, dezınfektsııalaý sııaqty máseleler jetip artylady. Degenmen olar meniń 30 jyl boıǵy syrlas dostarym sekildi. Kóktemniń shyǵýyn birge asyǵa kútemiz», - deıdi omartashy N.Donskoı.
