Ýkraınadaǵy jedel málimetterde Qazaqstan azamattarynyń esimderi anyqtalǵan joq - Qazaqstan konsýly
ASTANA. QazAqparat - Búgin Qazaqstan Respýblıkasynyń Ýkraınadaǵy konsýldyǵy «QazAqparat» tilshisiniń sol eldegi Qazaqstan azamattarynyń taǵdyry jóninde jibergen resmı saýalyna jaýap qaıyrdy.
Qazaqstannyń Ýkraınadaǵy konsýly Denıs Kımniń habarlaýynsha, qazirgi ýaqytta Ýkraınada 1287 Qazaqstan azamaty turaqty mekenjaı boıynsha turyp jatyr. Sonymen qatar qolda bar sońǵy aqparattar boıynsha 177 stýdent tálim alýda.
«21 aqpan kúngi jaǵdaı boıynsha Ýkraınanyń quzyrly organdarynan qaqtyǵystar kezinde japa shekken Qazaqstan azamattary týraly resmı málimetter konsýldyq bólimge kelip túsken joq. Sondaı-aq SІM, TJM, ІІM men Densaýlyq saqtaý mınıstrlikteriniń jedel málimetterinde Qazaqstan azamattarynyń esimderi anyqtalmady», - dep jazady D.Kım.
Sonymen qatar onyń aıtýynsha, qazirgi kúni Qazaqstan azamattaryn evakýatsııalaý jóninde suraq turǵan joq. Degenmen, Ýkraınadan ketýdi sheshken árbir qazaqstandyq bul elden erkin shyǵyp kete alady.
«Borıspol» áýejaıy shtattyq rejımde jumys jasaýda, oǵan barar jol ashyq. Kıev metrosynyń qyzmeti de jandandy. Sondaı-aq 21 aqpan kúni Ýkraınanyń barlyq temir jol baǵyttary ashyldy. Kıevte azyq-túlik ortalyqtary qalypty jaǵdaıda istep tur. Azyq-túlik ónimderiniń tapshylyǵy da baıqalmaıdy. Janar-jaǵar maı beketterindegi dúrlikpe de azaıdy», - deıdi konsýl.
Sonymen qatar konsýldyq bólim azamattarǵa jáne stýdenterge Kıev ortalyǵyna barmaýǵa jáne Ýkraınanyń ózge de qalalarynda adam kóp shoǵyrlanǵan jerlerde júrmeý jóninde túsindirý jumystary júrgizilýde. Ýkraınadan Qazaqstanǵa ushýdy jón dep tapqan stýdentterge áýejaıǵa deıin kólik usynyldy. Konsýldyq qyzmette 0444891858 nómiri boıynsha tikeleı baılanys jelisi ashyldy. Búgingi tańda Qazaqstan azamattary osy nómir boıynsha negizinen keńes alý úshin qońyraý shalýda.
