Ýkraınadaǵy saılaýda halyqaralyq baıqaýshylardyń roli joǵary boldy - TMD Parlamentaralyq assambleıasy keńesiniń bas hatshysy
SANKT-PETERBOR. Qańtardyń 21-i. QazAqparat /Elena Mıagkova/ -Táýelsiz Memleketter Dostastyǵynyń Parlamentaralyq assambleıasy keńesi Ýkraınadaǵy prezıdenttik saılaýdy «ádil jáne tynysh ótti» dep tanydy.
Bul týraly sársenbi kúni baspasóz máslıhatynda TMD Parlamentaralyq assambleıasy keńesiniń bas hatshysy Mıhaıl Krotov málim etti.
M.Krotovtyń aıtýynsha, saılaýdyń birinshi kezeńiniń barysynda 3 myńdaı halyqaralyq baıqaýshy tirkeldi, onyń úshten biri memleketaralyq uıymdardyń ókilderi boldy. «Biz 2009 jyldyń jeltoqsan aıynyń 10-ynan bastap Kıev, Lvov, Donetsk, Odessa jáne Sımferopol qalalarynda shtabtar ashtyq»,- dep málim etken Parlamentaralyq assambleıa keńesiniń bas hatshysy, prezıdenttik saılaýdyń qorytyndysy shyǵarylǵansha birde-bir shtabtyń jabylmaıtynyn aıtty.
Saılaýdyń birinshi týrynyń barysynda TMD Parlamentaralyq assambleıasynyń baıqaýshylary Ýkraınanyń 17 aımaǵynda daýys berýdiń barysyn qadaǵalady.
«Bul saılaýda halyqaralyq baıqaýshylardyń roli óte joǵary boldy. Ekinshi kezeńde olardyń roli budan da joǵary bolatyny anyq», dep túıindedi óz sózin TMD Parlamentaralyq assambleıasy keńesiniń bas hatshysy Mıhaıl Krotov.
