Ýkraınadaǵy qazaqstandyq: Elshilikke qalaı jeterimdi bilmeı otyrmyn

NUR-SULTAN. QazAqparat – Qazaqstan azamaty Medına Gýmerova Kıevte turady. Qazir jerlesimiz elge qaıtýdyń qamyn qarastyryp jatyr. Osy oraıda QazAqparat tilshisi otandasymyzdan Ýkraınadaǵy qazirgi jaǵdaı týraly surap bilgen edi.

«Men Qazaqstannyń azamatymyn, Kıevte turamyn. Osynda turaqty turyp, jumys isteımin. Buǵan deıin jaǵdaı tynyshtalsyn dep kúte turǵan bolatynmyn, sebebi shekarada uzaq keptelis. Osyndaǵy Qazaqstannyń elshiligimen baılanystym, elge qaıtýdyń amalyn qarastyryp jatyrmyn. Kıev qalasynda keshki saǵat 17:00-den tańǵy 8:00-ge deıin komendanttyq saǵat. Syrtqa shyǵýǵa bolmaıdy. Qazir úıde jalǵyzbyn, jumysymdy onlaın jalǵastyryp jatyrmyn. Qazaqstanda ata-anam turady», - dedi Medına Gýmerova.

Aıtýynsha, otandasymyz zatyn jınap, elge qaıtýǵa daıyn otyr.

«Elshilikpen baılanysqanymda, maǵan elshilik ǵımaratyna kelip kútýimdi surady. Qazir zattarymdy jınap daıyn otyrmyn. Biraq elshilikke qalaı jeterimdi bilmeı otyrmyn. Sebebi taksı tabý qıyn jáne baǵa ósip ketken», - deıdi otandasymyz.