Ýkraınadaǵy daǵdarys teńge baǵamynyń ózgerýine áser etpeıdi - Ulttyq bank tóraǵasynyń keńesshisi

ASTANA. QazAqparat - Saıası ahýaldan zardap shekken Ýkraına ekonomıkasynyń quldyraýy teńgeniń baǵamyna áser etpeıdi, dep esepteıdi QR Ulttyq bank tóraǵasynyń keńesshisi, Qazaqstannyń tanymal ekonomıkalyq taldaýshylardyń biri Oljas Qudaıbergenov.

«Ýkraınadaǵy saıası tolqýlardyń teńgege áseri tym az, tipti joq deýge bolady. Eger Ýkraınamen syrtqy saýda aınalymyn qaraıtyn bolsaq, onyń úlesi jalpy saýdanyń 4 paıyzyn ǵana quraıdy jáne saýda saldosynyń kólemi shamamen 200 mln. dollarǵa teń. Sondyqtan Ýkraınada qandaı oqıǵalar oryn alsa da, olar teńgeniń baǵamyna, ásirese devalvatsııaǵa áser ete almaıdy», - dedi ol «QazAqparat» tilshisiniń saýalyna bergen jaýabynda. Onyń oıynsha, kerisinshe teńge baǵamy bolashaqta 182-183 teńgege deıin túsýi tıis. «Meniń pikirimshe, kóktemde teńgeniń baǵamy nyǵaıady. Óıtkeni devalvatsııa artyǵymen jasaldy. Naryqta osyndaı pikir bar. Meniń bilýimshe, devalvatsııa artyǵymen jasalýy múmkin. Sol sebepti teńge nyǵaıa túsýi tıis dep sanaımyn», - dedi ol.