Ýkraınadaǵy qaqtyǵysty retteý: Toqaev pen Pýtın ne týraly sóılesti

ASTANA. KAZINFORM – Qazaqstan Prezıdentiniń keńesshisi – baspasóz hatshysy Rýslan Jeldibaı Memleket basshysy Qasym-Jomart Toqaev pen Reseı prezıdenti Vladımır Pýtınniń telefon arqyly ne týraly sóıleskeni jóninde málimet berdi, dep habarlaıdy Tengrinews.kz. 

Prezıdenttiń baspasóz hatshysynyń aıtýynsha, áńgime Reseı tarapynyń bastamasymen ótken. 

– Kelissózder dostyq ári senimdi sıpatta ótti. Negizgi nazar Ýkraınadaǵy qaqtyǵysty retteýge baǵyttaldy. Vladımır Pýtın AQSh Prezıdentiniń arnaıy ókilimen ótkizilgen kelissózderdiń nátıjeleri jóninde jan-jaqty aqparat berdi. Qasym-Jomart Toqaev qol jetkizilgen aldyn ala ýaǵdalastyqtardy quptap, Qazaqstannyń soǵys qımyldaryn toqtatýǵa baǵyttalǵan beıbit joldy izdeýdi árqashan qoldap kele jatqanyn atap ótti, - dedi Rýslan Jeldibaı.

Sonymen qatar Memleket basshylary qazaq-reseı qarym-qatynasyna qatysty ekijaqty kún tártibindegi máselelerdi de talqylady.

– Qazaqstan Prezıdenti bıyl qarasha aıynda josparlanǵan Máskeýge memlekettik saparǵa aıryqsha mán beretinin atap ótti. Bul sapardyń basty maqsaty – strategııalyq áriptestik pen odaqtastyq rýhyndaǵy jan-jaqty yntymaqtastyqty tereńdetý, - dep atap ótti Prezıdenttiń baspasóz hatshysy.

Buǵan deıin, Memleket basshysy Qasym-Jomart Toqaev Reseı prezıdenti Vladımır Pýtınmen telefon arqyly sóıleskenin jazǵanbyz.