Ýkraınadaǵy qaqtyǵys «jahandyq» sıpat aldy — Makron málimdemesi
ASTANA. KAZINFORM — Frantsııa prezıdenti Emmanıýel Makron «Ýkraınada keń aýqymdy soǵys júrgizip jatqan Reseı búkil Eýropaǵa qaýip tóndirgenin» málimdedi, dep habarlaıdy dw.com.
Sársenbi, 5 naýryzda halyqqa arnaǵan teleúndeýinde ol Reseıdiń Soltústik Koreıa sarbazdary men ırandyq áskerı tehnıkany qoldaný arqyly Ýkraınadaǵy soǵysty «jahandyq qaqtyǵysqa» aınaldyrǵanyn atap ótti.
Sonymen qatar, Makronnyń aıtýynsha, Reseı óziniń áskerı áleýetin belsendi túrde arttyryp otyr.
— Reseı Ýkraınamen toqtaıdy degenge kim senedi? Reseı qazirdiń ózinde Frantsııa men Eýropaǵa qaýip tóndirdi, — dep málimdedi Frantsııa prezıdenti.
Makron AQSh-tyń «biz jaqta bolatynyna» sengisi keletinin, biraq Eýropa kerisinshe daıyn bolýy kerek ekenin atap ótti. Frantsýz kóshbasshysy Donald Tramp prezıdenttik qyzmetke kiriskennen beri Reseı men AQSh arasyndaǵy jaqyndasýdy «jańa dáýir» dep atady.
Frantsııa eýropalyq odaqtastaryn ıadrolyq qarýmen qorǵaý múmkindigin qarastyrady, dep málimdedi Makron. Ol sondaı-aq Eýropadaǵy ıadrolyq tejeý máselesi boıynsha «strategııalyq pikirtalasqa» qatysty pikirin aıtyp, GFR bolashaq kantsleri bolýy múmkin Frıdrıh Mertstiń (Friedrich Merz) Berlın, London jáne Parıj arasynda Eýropa qurlyǵyndaǵy ıadrolyq qaýipsizdik máselesi boıynsha kelissózder júrgizýge «tarıhı úndeýin» eske saldy. Emmanıýel Makron Frantsııanyń ıadrolyq qarýyn qoldaný týraly kez kelgen sheshimdi respýblıka prezıdenti shyǵaratynyn qosyp ótti.
Úndeý barysynda Frantsııa prezıdenti kelesi aptada Parıjde Ýkraınaǵa bitimgershilik kúshterin jiberý arqyly beıbitshilikti qamtamasyz etýge daıyn Eýropa elderi áskerleri bas shtab basshylarynyń kezdesýi ótetinin habarlady. Makronnyń atap ótýinshe, bul áskerler bolashaq beıbit kelisimniń saqtalýyn baqylaý úshin Ýkraınaǵa ornalastyrylýy múmkin.
— Olar búgin soǵyspaıdy, maıdanda soǵyspaıdy, biraq bitimgershilik kelisimge qol qoıylǵan kezde onyń tolyq saqtalýyn qamtamasyz etý úshin sonda bolady, — dedi Frantsııa prezıdenti.
Sonymen birge, Makron Ýkraınadaǵy beıbitshilikti «Reseıdiń buıryǵymen jáne eshbir baǵamen qurýǵa bolmaıtynyn» jáne soǵysty toqtatý týraly kelisim «Ýkraınanyń kapıtýlıatsııasyn bildirmeýi» kerektigin atap ótti.