Ýkraınada Joǵarǵy rada saılaýynyń nátıjeleri jarııalandy
Jarııalanǵan málimetter boıynsha, Aımaqtar partııasy 30,00% (6 mln 116 myń 746 daýys) jınady, dep habarlady RBK.
«Batkıvşına» 25,54% (5 mln 209 myń 090 daýys), «Ýdar» - 13,96% (2 mln 847 myń 979 daýys), Ýkraına Kommýnıstik partııasy - 13,18% (2 mln 687 myń 269 daýys), «Svoboda» - 10,44% (2 mln 129 myń 933 daýys) jınaýda.
Sóıtip, Aımaqtar partııasy 72 mandat, «Batkıvşına» - 62, «Ýdar» - 34, Kompartııa - 32, «Svoboda» - 25 mandat alady.
Qalǵan partııalar 5 paıyzdyq mejeni eńsere almaı, Joǵarǵy radaǵa ótpeı qaldy.
OSK otyrysynda Ortalyq saılaý komıssııasynyń tóraǵasy Vladımır Shapoval búgingi kúni komıssııa tutastaı alǵanda 186 bir mandatty okrýg boıynsha nátıjelerdi anyqtaǵanyn habarlady. Daýly okrýgter málimetterin esepke alǵanda, munda «Aımaqtar partııasynyń» 115 ókili, «Soıýz» partııasynyń 1 ókili, 45 ózin-ózi usynǵandar, 40 «Batkıvşına» ókili, 12 «Svoboda» ókili, 2 Halyqtyq partııa ókili, 3 «Edınyı tsentr» partııasy ókili, 6 «Ýdar» partııasynyń ókili, 1 Radıkaldyq partııa ókili jeńiske jetýde.
Budan buryn, 5 qarashada Ýkraına OSK bes okrýgte - 94, 132, 194, 197 jáne 223-shi okrýgterde saılaý zańnama buzýshylyqpen ótken dep taný týraly qaýly alǵan bolatyn. Ortalyq saılaý komıssııasy bul okrýgterde 2013 jylǵy qańtar aıynda qaıtadan saılaý ótkizýdi usyndy. Kelesi kúni Ýkraına Joǵarǵy radasy osy okrýgterde qaıta saılaý ótkizý týraly usynbamen qaýly qabyldady.
Eske sala keteıik, Ýkraınadaǵy parlamenttik saılaý 28 qazanda ótken bolatyn. Sońǵy 10 jylda alǵashqy ret daýys berý aralas júıemen ótkizildi. Joǵarǵy radaǵa 5 myńnan astam úmitker qatysty.
Zańǵa sáıkes 225 depýtat partııalyq tizimmen, sonsha parlamentshi majorıtarlyq júıemen bir mandatty okrýgtardan saılanady. 21 saıası partııa óz kandıdattaryn usyndy.
Ýkraındyq baıqaýshylar ótken naýqandy el tarıhyndaǵy eń las saılaý dep atady. Batystyq baıqaýshylar baǵalaýlarda barynsha saq bolýǵa tyrysty, reseılik ókilder saılaýdaǵy qandaı da bir buzýshylyqtar jóninde málimdemeler jasaǵan joq.
