Ýkraınada ushaq apatty jaǵdaıda qonyp, bes adam kóz jumdy
LЬVOV. ÝKRINFORM-QazAqparat – «Ýkraına-Aeroalıans» áýe kompanııasynyń An-12 ushaǵy Lvov áýejaıynyń mańynda apatty jaǵdaıda qondy. Saldarynan 5 adam kóz jumdy. Bul jóninde Facebook jelisinde Infraqurylym mınıstri Vladıslav Krıklıı málim etti, dep habarlaıdy QazAqparat Ýkrınformǵa silteme jasap.
«Aldyn ala málimetterge sáıkes, Ýkraına-Aeroalıans áýe kompanııasynyń An-12 #UR-CAH ushaǵy Vıko (Ispanııa) – Lvov baǵyty boıynsha #UKL4050 charterlik júk reısin oryndaý kezinde aerodrom janyndaǵy Sokolnıkı aýylyna apatty jaǵdaıda qonǵan. Bortta 7 ekıpaj múshesi men júkke ilesip júrgen 1 adam boldy. Saldarynan 3 adam kóz jumyp, 3 adam aýyr jaraqattandy, taǵy ekeýi izdestirilý ústinde. Qutqarý operatsııasy jalǵasyp jatyr», - dep jazdy Krıklıı.
Artynan mınıstr 5 adamnyń kóz jumǵanyn málim etti.
Sondaı-aq, ol ushaqtyń apatty jaǵdaıda qonýyna janarmaıdyń taýsylýy sebep bolǵanyn atady. Tergeý jalǵasýda.
Mınıstr qaza tapqandardyń týǵan-týystaryna qaıǵyra kóńil aıtty.
Ýkraınanyń Tótenshe jaǵdaılar jónindegi memlekettik qyzmetinen málim etkendeı, 4 qazan kúni tańerteń radardan joǵalyp ketip, ushyp-qoný jolaǵynan 1,5 shaqyrym jerden tabylǵan An-12 ushaǵy «Lvov» áýejaıynyń mańyna apatty jaǵdaıda qonýǵa májbúr bolǵan.
«4 qazan kúni saǵat 07:10-da «Lvov» halyqaralyq áýejaıynan 13,7 shaqyrym qashyqtyqta An-12 ushaǵy radardan joǵalyp ketkeni týraly habar kelip tústi. Saǵat 07:29-da ekıpajdyń bir múshesi baılanysqa shyǵyp, An-12 ushaǵy apatty jaǵdaıda qonǵany týraly málim etti. 07:46-da An-12 ushaǵy ushyp-qoný jolaǵynan 1,5 shaqyrym jerde tabyldy», - delingen habarlamada.
Ushaq órtenbegen. Ekıpajdy zaqymdalǵan ushaqtan shyǵarý jumystaryna Tótenshe jaǵdaılar jónindegi memlekettik qyzmetten 41 adam men 7 tehnıka jumyldyryldy.
