Ýkraınada teraktiden zardap shekkender arasynda Joǵarǵy rada depýtaty bar

ASTANA. QazAqparat - Kıevte jarylys saldarynan bir adam qaza bolyp, tórteýi jaraqattandy. Bul týraly Kıev prokýratýrasynyń ókili Pavel Kononenko málim etti, dep jazady TASS .

«Jarylys saldarynan bes adam zardap shekti. Olardyń biri aýrýhanada kóz jumdy», dedi ol Ýkraınanyń "Obşestvennoe TV" telearnasynyń efırinde.

Kononenko málim etkendeı, 1986 jyly týǵan arnaıy maqsattaǵy jasaq qyzmetkeri qaza boldy. Jaraqattanǵandar arasynda Radıkaldy partııadan saılanǵan Joǵarǵy radanyń depýtaty Igor Mosııchýk, polıtsııa qyzmetkeri, patrýldik-beket qyzmetiniń ókili jáne áıel adam bar.

Dárigerler Mosııchýkqa operatsııa jasady. Onyń aıaq-qoldary, arqasy men ish qýysy jaraqattanǵan. Ózge zardap shegýshiler jarqynshaqtardan túrli aýyrlyq dárejesinde jaraqattar aldy.

Habarlanǵandaı, sársenbi kúni keshke Mıtskevıch kóshesindegi Ekspresso telekompanııasy keńsesiniń janynda jarylǵysh zat ornatylǵan mototsıkl jarylǵan. Jarylys barysynda Mosııchýk telekompanııadan shyǵyp kele jatqan.

Keıin tergeý qyzmetteri jarylysty terrakti dep baǵalady . «Mıtskevıchtegi jarylys boıynsha tergeý isi Ýkraınanyń qaýipsizdik qyzmetine berildi. Protsessýaldy basqarýdy Ýkraınanyń bas prokýratýrasy júzege asyrýda. Qylmystyq kodekstiń 258-inshi baby - «lańkestik akti», - dep jazdy Ýkraına Іishki ister mınıstriniń keńesshisi Zorıan Shkırıak Facebook paraqshasynda.

Foto Ýkraına ІІM basshysynyń keńesshisi Anton Geraşenkonyń Facebook-tegi paraqshasynan alyndy.