Ýkraınada tabylǵan jaýyngerdiń súıegi týǵan aýylynda jerlendi - SQO

PETROPAVL. QazAqparat – Ýkraınanyń Kıev oblysynda tabylǵan maıdanger Qaıyrjan Tikshekeevtiń súıegi týǵan jeri Soltústik Qazaqstan oblysy Dáýqara aýylynda qaıta jerlendi, dep habarlaıdy QazAqparat tilshisi.

Qaıyrjan Tikshekeev Ekinshi dúnıejúzilik soǵys kezinde habar-osharsyz ketkenderdiń sanatynda boldy. Bıyl naýryz aıynda jaýyngerdiń týǵan- týystaryna Ýkraınadan habar jetti. Sondaǵy «Vertıkal» atty izdeý bólimi Kıev oblysy Makarov aýdanynda bir top maıdangerdiń súıegin tapqan. Sonyń ishinde soltústikqazaqstandyq jaýynger de bolypty.

«Atamyzdan 1941 jyly habar úzilgen eken. Qaıyrjan atamyzdy ájemiz ómir boıy izdedi. Týystarymyz Máskeýge de bardy. Odan keıin ákem 2004 jyly marqum bolǵansha izdedi. Onyń amanaty maǵan qaldy. Seksen jylǵa jýyq izdedik. Ýkraınadaǵy izdeýshi topqa, «Atamnyn Amanaty» qoǵamdyq birlestigine jáne Aıyrtaý aýdanynyń ákimdigine, aýdandyq Qorǵanys isteri jónindegi bólimge jáne aýyldastaryma, basqa da kómekteskenderge alǵysymdy bildiremin», – dedi jaýyngerdiń nemeresi Marat Tikshekeev.

Qaıyrjan Tikshekeev 1916 jyly Aıyrtaý aýdany Dáýqara aýylynda dúnıege kelgen. Ol 1940 jyly aqpanda áskerge alynyp, alǵashqylardyń biri bolyp soǵysqa kirisedi. 1941 jyly Kıevti qorǵaǵan 28-shi atqyshtar dıvızııasynyń quramynda bolǵan.

Ýkraınany azat etýge qatysyp, sol jerde mert bolǵan jaýyngerdiń súıegin týǵan elge jetkizýge qazaqstandyq «Atamnyn Amanaty» qoǵamdyq birlestigi kómektesti.

Dáýqara aýylynda Ekinshi dúnıejúzilik soǵysta qaza tapqan jaýyngerlerge arnalǵan

eskertkishtiń janynda Qaıyrjan Tikshekeevtiń súıegin qaıta jerleýge arnalǵan mıtıng ótti, bozdaqtar arýaǵyna baǵyshtalyp quran oqyldy.

Jaýynger rýhyna taǵzym etý maqsatynda bir mınýt únsizdik jarııalanǵannan soń Qaıyrjan Tikshekeevtiń súıegi týǵan aýylyndaǵy zıratqa jerlendi.