Ýkraınada tabıǵat qorǵaýshylar jarqanattarǵa uıa jasap berýde
Tabıǵat janashylary jarqanattardyń kóbeıip, ósip-ónýine jaǵdaı jasaýdy maqsat tutyp otyr. Sebebi ýkraın jerinde mekendeıtin bul qolqanattylardyń kóp túri Qyzyl kitapqa engizilgen. Tabıǵat qorǵaýshylar men ekobelsendilerdiń arqasynda myńǵa jýyq jarqanattyń jyly uıasyn ázirlemek. Olar qazirdiń ózinde 70 oryn daıyndap qoıǵan. Alaıda mekendeýshiler birden paıda bola qoımaıdy. Jarqanattardyń uıaǵa bas suǵýy úshin olar aldymen jaýyn shaıyp, orman ıisi sińip, ekojúıeniń bir bólshegine aınalýy tıis.
«Kóbine jarqanattardyń kóbeıýine yńǵaıly oryndar jetispeıdi. Bul qustarǵa erekshe jaǵdaı jasalýy kerek. Tabıǵatta olar jartas pen shatqaldardaǵy tastardyń arasyn panalaıdy. Qalada da turar edi. Biraq shýǵa sezimtal qustar ondaǵy qysymǵa shydaı almaıdy. Sondyqtan olarǵa arnaıy uıa qajet», - deıdi ekojoba úılestirýshisi Jıvodana Jarıkova.
Syrt kózge jarqanattardyń orny qaratorǵaıǵa arnalǵan uıaǵa uqsaıdy. Biraq olarǵa esik aldynan emes, astynan ornatylady. Bul qustardyń óz mekenine osylaı kiretindiginen ǵana emes, sonymen qatar artyq jaryq túspes úshin jasalǵan. Sonymen qatar qustar salbyrap ilinip turatyndaı kertikteri de bar. Al uıany kez kelgen talǵa, yńǵaıy kelse, qylqan japyraqtysyna ornatqan abzal.
«Uıany shama kelgenshe joǵary qoıǵan durys. Bul olarǵa jyrtqyshtar shabýyl jasamas úshin qajet. Ári keı jarqanattardyń mekenin bıik salatyndary bolady. Bir talǵa birnesheýin de ornatýǵa bolady. Sondaı-aq ońtústik jaqtan ushyp kirgenge daǵdylanǵan bul qustarǵa kedergi keltiretindeı butaqtardyń bolmaǵany abzal», - deıdi «Goloseevskıı» ulttyq tabıǵı saıabaqtyń qyzmetkeri Andreı Hrýtba.
Jarqanattyń uıasyn sheberge 3 dollarǵa tapsyrys berip nemese óz qolyńmen de jasaýǵa bolady. Ázirge belsendiler sharany ózderi ǵana júrgizip jatyr. Keleshekte tabıǵatty qorǵaýshylar Ýkraına ormandarynda tıin, úki jáne basqa da qustar men jándikterge uıa salýdy kózdep otyr.
