Ýkraınada «Shańyraq» qazaq mektebi qalaı ashyldy
Ózge eldegi qazaq mektebiniń ashylý tarıhy jáne jumys barysymen tanysý maqsatynda QazAqparat tilshisi Qazaqstannyń Harkov qalasyndaǵy qurmetti konsýldyń keńesshisi Stefanııa Rıshkomen suhbattasqan bolatyn.
«Harkovtegi qazaq tili mektebi Ýkraınadaǵy Qazaqstannyń elshiligi bastamasymen ashyldy. Dálirek aıtqanda, bul ıdeıany bizge Ýkraınadaǵy Qazaqstannyń elshisi Darhan Káletaev usyndy. Aldymen qazaq tilin jetik biletin jáne ózgege úırete alatyn maman izdeýge kiristik. Daıyndyq jumystary jarty jylǵa jýyq ýaqyt aldy. Nátıjesinde qazaq tilin úıretetin mamandy taptyq, ol osyndaǵy dıasporanyń ókili Gýlıa Saıko degen qazaq azamaty. Ol kisi Shymkenttiń týmasy, biraq biraz jyldar Ýkraınada turyp jatyr», - dedi S. Rıshko.
Onyń aıtýynsha, Harkov qalasynan bólek, el astanasy Kıevte de elshilik janynan qazaq tilin úıretetin kýrs ashylǵan.
«Qazaq tilin úırenýge ásirese balalardyń qyzyǵýshylyǵy joǵary. Jalpy Harkovte turaqty jáne ýaqytsha jumys babymen kelip, turyp jatqan qazaqstandyq otbasylar barshylyq. Erekshe aıtyp ótetin sát, bizge kelýshiler qazaq tilimen qatar ulttyq salt-dástúr, ádet-ǵuryp pen qazaqı mádenıetti de úırenedi. Úıretý ádisine kelsek, ázirge negizgi kelýshiler balalar bolǵandyqtan, olarǵa tildi oıyn jáne tanymdyq ádis arqyly sińirip jatyrmyz. ıAǵnı balalardyń jas erekshelikterine sáıkes, artyq júktemesiz tásil qoldanylady. Sol sııaqty balalar qazaq tilinde taqpaq, óleń jattaıdy. Jáne de elshiliktiń qoldaýymen túrli mádenı-aǵartý is-sharalar uıymdastyrylady», - deıdi ol.
Sondaı-aq, konsýl keńesshisi «Shańyraq» ataýyn alǵan qazaq tili mektebine kelem deýshilerge esik árdaıym ashyq jáne sabaqtyń tegin uıymdastyrylatynyn aıtty.
«Árıne basymdyq qazaq tilin úıretýge beriledi, degenmen bul shyǵarmashylyq mektep bolyp sanalady. Sebebi munda balalar án aıtady, óleń oqıdy, til úırenedi, sol arqyly otandy súıýge, qurmetteýge jáne óz tarıhyn bilýge baýlıdy. Jalpy bolashaqqa jospar kóp. Sonyń biri qazaqstandyq jáne bizdiń balalarmen birlesken is-sharalar ótkizý, sol sııaqty osyndaǵy balalardy Qazaqstanǵa saıahatqa alyp barý. Basty qýantatyny ata-analar men balalardyń qazaq tilin úırenýge degen yntasy joǵary. Ata-analar mektep ashylǵan kúnnen bastap, balalaryn alyp kelip, ózderi de belsendilik tanytyp jatyr», - dedi ol.
