Ýkraınada memlekettik tilge qysym jasaǵandardy túrmege otyrǵyzý usynyldy
ASTANA. 26 naýryz. QazAqparat - Ýkraınada memlekettik tilge qysym kórsetkeni úshin qylmystyq jaýapkershilik engizý usynyldy, dep habarlaıdy Lenta.ru aqparattyq portaly.
Tıisti zań jobasyn parlamentke «Svoboda» oppozıtsııalyq ultshyldar partııasynyń músheleri engizdi. Qylmystyq kodekske túzetýler engizýge baǵyttalǵan jobaǵa sáıkes, jazany «memlekettik tildi aqparattyq keńistikten qasaqana yǵystyrý, Ýkraına aýmaǵynda qodanylý aıasyn qysqartý, erkin qoldanýǵa tyıym salý nemese kedergi jasaý, kommýnıkatsııa salasynda, mektepaldy, orta jáne joǵary bilim berý mekemelerinde shet tilderiniń basymdylyǵyna qoldan jaǵdaı jasaý, sonymen qatar memlekettik tildi kópshilik aldynda qorlaý maqsatynda jasalǵan is-áreketterge» qarsy qoldaný josparlanýda.
Joǵaryda aıtylǵan áreketter úshin ultshyldar 3 jylǵa deıin bas bostandyǵynan aıyrý nemese shekteý jazasyn qoldanýdy kózdeýde. Al eger jazaǵa tartylýshy memlekettik qyzmetker bolsa, jazany 5 jylǵa deıin qarastyrýdy usynǵan. Ýkraın tiline qysym jasaý «aýyr jaǵdaılarǵa» soqtyrǵan bolsa, jaza merzimin 7 jylǵa deıin sozý kórsetilgen.
Avtorlardyń aıtýynsha, atalmysh ózgerister qosymsha bıýdjet qarajatyn talap etpeıdi.
