Ýkraınada mektepte sabaqty taza aýada ótkizý usynyldy

KIEV. QazAqparat – Ýkraınada barlyq mektepterge jańa oqý jylynda sabaqty taza aýada ótkizý usynyldy. Bul týraly baspasóz brıfıngi kezinde jańa oqý jylynyń erekshelikterin túsindirgen Ýkraına bilim mınıstriniń mindetin ýaqytsha atqarýshy Sergeı Shkarlet málim etti, dep habarlaıdy QazAqparat Ýkrınform agenttigine silteme jasap.

Atap aıtqanda, ol sabaqty taza aýada ótkizý – barlyq mektepterge berilgen keńes ekenin málimdedi. 1 qyrkúıekte dástúrli mektep jıyny ótkizilmeıdi. Bul adamdardyń jınalýyna jol bermeıdi. 1 qyrkúıekte mektep oqýshylary úshin pandemııa jaǵdaıyndaǵy ómir men bilim alý týraly sabaq ótkiziledi.

Eldiń bilim mınıstriniń aıtýynsha, ár mektepke epıdemııalyq qaýipsizdik erejelerin saqtaý: maska taǵý erejeleri, áleýmettik qashyqtyq, gıgıena erejeleri, qyzmetkerlerdiń dene qyzýyn ólsheý týraly arnaıy sýretti aqparattyq materıal jiberildi.

Shkarlet oqýshylar men muǵalimderdi mektepke jetkizetin arnaıy kólikte erekshe erejeler saqtalýy tıis ekenin atap ótti: munda barlyq adam mindetti túre maska taǵyp, júrgizýshilerdiń dene qyzýy kún saıyn ólshenedi, kúnine eki ret dezınfektsııa jasalady, jolaýshylar sany otyratyn oryn sanynan aspaýy tıis.

BǴM basshysy mektep jeke qorǵanys quraldary men dezınfektsııalyq zattardy satyp alýǵa mindetti emes ekenin, al qorǵanys maskalaryn satyp almaı, qoldan tigilgenin qoldanýǵa bolatynyn eske saldy.

Eger mektepte arnaıy quraldarmen jabdyqtaýda kemshilikter men problemalar týyndasa, ata-analar men muǵalimder ol týraly jergilikti bılik organdaryn aqparattandyrýǵa nemese bilim mınıstrliginiń jedel jelisine telefon soǵa alady.