Ýkraınada Malaysia Airlines laıneri qulaǵan soń kompanııa aktsııalary 11% arzandady
ASTANA. QazAqparat - Juma kúni Malaysia Airlines kompanııasy aktsııalarynyń baǵasy birden tómendep ketti. Bul Boeing-777 ushaǵynyń Ýkraına aýmaǵynda qulaýymen baılanysty, dep habarlady ITAR-TASS.
Kýala-Lýmpýr bırja qorynda bolǵan tańerteńgilik saýdada ulttyq áýe tasymaldaý kompanııasynyń aktsııalary birden 11% qunsyzdandy.
Malaysia Airlines osydan birneshe aı buryn Úndi teńiziniń aýmaǵynda joǵalǵan ushaǵynan keıin qalpyna kele almaı jatyr. Ol kezde ushaq bortynda 239 adam bolǵan.
Juma kúni Azııanyń kóptegen qorynda, sonyń ishinde Sıngapýr, Gonkong, Indonezııa, Koreıa jáne Fılıppınde kórsetkishterdiń tómendegeni baıqaldy. Jergilikti sarapshylar atap ótkendeı, ınvestorlardy Ýkraınadaǵy geosaıası jaǵdaı alańdatady.
Boeing-777 Malaysia Airlines Reseı shekarasynyń qasyndaǵy Ýkraına aýmaǵynda qulady. Laıner Amsterdam - Kýala-Lýmpýr baǵytynda ushqan. Onyń bortynda 298 adam - 283 jolaýshy men 15 ekıpaj múshesi boldy. Laıner 17 shildede shamamen saǵat 17:25 msk-te Reseı shekarasynan asyp ótýi tıis edi.
