Ýkraınada koronavırýs órshidi, Frantsııa men Brıtanııada «qyzyl aımaqtar» paıda boldy
LONDON. QazAqparat – Belgııa aýrýhanalarynyń Covid-19 aýrýyn emdeý bólimshelerinde 50%-dan astam oryn tolyp qaldy. Nıderlandy, Ýkraına men Germanııada vırýsqa shaldyǵýshylar rekordy jańardy, Frantsııa men Ulybrıtanııada asa qatań karantın erejeleri bar «qyzyl aımaqtar» paıda bolady, dep habarlaıdy QazAqparat VVS agenttigine silteme jasap.
Izraıl bıligi elde qyrkúıektiń ortasynda qaıta engizilgen lokdaýn nátıje bergenin, ıaǵnı ınfektsııanyń taralýy báseńdegenin habarlady.
Densaýlyq saqtaý mınıstrliginiń habarlaýynsha, sońǵy táýlikte elde Covid-19-dyń 4,1 myń jańa jaǵdaıy anyqtalǵan. Biraq úshinshi kún qatarynan kórsetkish tómendeýde. Izraılde pandemııa bastalǵaly beri koronavırýsqa shaldyǵý jaǵdaılarynyń jalpy sany 282 myńnan asady.
Eýrapada jaǵdaı nasharlap barady
Germanııada sońǵy táýlikte tórt myń adamnan aýrý anyqtalǵan. Bul – sáýir aıynyń basynan bergi eń joǵarǵy táýliktik kórsetkish. Ótken sársenbide 16 adam kóz jumǵan. Bılik muny pandemııanyń ekinshi tolqynymen ǵana emes, qyrkúıekten beri elde testileý kóleminiń aıtarlyqtaı artýymen de baılanystyrady.
Ýkraına bıligi táýliktik rekordtyq kórsetkishti rastady. Sońǵy 24 saǵatta 5 397 adam aýrýǵa shalyqqan. Djons Hopkıns ýnıversıtetiniń málimeti boıynsha, elde koronavırýs juqtyrǵandardyń jalpy sany 252 myń adamdy quraıdy, 4800-i qaıtys bolǵan.
Beısenbi kúni Frantsııanyń bes qalasy, Lıll, Lıon, Grenobl, Sent-Eten jáne Týlýza joǵary qaýip aımaqtary bolyp jarııalandy. Atalǵan qalalardyń barlyǵynda ınfektsııanyń taralý kórsetkishi 1000 adamǵa shaqqanda 250-den asqan. Jaqynda el prezıdenti Emmanýel Makron Frantsııanyń kóptegen aımaqtaryna da Parıj ben Marselde qoldanylyp jatqan qatań sharalardy engizý kerek dep málimdedi. Sońǵy táýlikte búkil el boıynsha reanımatsııa bólimshelerine koronavırýs ınfektsııasyn juqtyrǵan 143 naýqas tústi.
Nıderlandyda sońǵy 24 saǵat ishinde bes myńǵa jýyq adamǵa Covid-19 dıagnozy qoıylǵan.
Italııada tótenshe jaǵdaı 2021 jylǵy qańtar aıyna deıin uzartyldy. Munda dalada da, ǵımarat ishinde de maska taǵý mindetteldi. Bul talap Italııanyń barlyq aımaǵyna qatysty.
Shvetsııanyń ınternattary men qarttar úıinde jaǵdaı kúrt nasharlap ketti.
Eske sala keteıik, Shvetsııa – pandemııamen kúresý úshin karantın engizbegen sanaýly elderdiń biri. Djons Hopkıns Ýnıversıtetiniń málimeti boıynsha, elde 96,7 myńǵa jýyq adam koronavırýspen aýyryp, 5 892 adam qaıtys boldy.
