Ýkraınada kınoteatrlar 2 shildeden bastap ashylady
Bul jóninde keshe Joǵary Radadaǵy gýmanıtarlyq jáne aqparat saıasaty komıtetiniń kınematografııa men jarnama bóliminiń tóraǵasy Pavel Sýshko Telegram arnasynda málim etti.
Bul sheshim eldiń mádenıet jáne aqparat saıasaty mınıstri Aleksandr Tkachenko jáne densaýlyq saqtaý mınıstri Maksım Stepanovpen kezdesýden keıin qabyldanǵan.
«Kınoteatrlardy ashý máselesin talqyladyq. Aldyn ala boljam boıynsha, kınoteatrlar 2 shildeden bastap esigin aıqara ashady» dep jazdy Sýshko.
Onyń aıtýynsha, jańa fılmder bolmaǵandyqtan kınoteatrlar 10 maýsymnan bastap ashyla almaǵan. Óıtkeni Mınıstrler kabıneti karantındi jeńildetýdiń kezekti satysynda dál osy datany belgilegen edi.
«Kınoteatrlarǵa sondaı múmkindik berilse de, olar ony paıdalana almady. Shildede de kórermendi nemen qarsy alatynyn bilmeı otyr. Al eger olar ashylatyn bolsa, onda olar búkil qýatyn 100 paıyz iske qosýy tıis. Bul degenimiz personal men tehnıkalyq qamtý túgel jumysqa shyǵady, sóıtip kınoteatrlar barlyq shyǵyndy moınyna alady degen sóz. Sáıkesinshe ındýstrııa onsyz da karantınnen keıin tıtyqtap turǵanda tabyssyz jumys isteıdi. Bul máseleni densaýlyq saqtaý mınıstrliginde kóterdik. Osyǵan qatysty kınoteatrlardy birtindep iske qosý jónindegi óz usynystarymdy berdim» dep atap ótti parlamentarıı.
Eske sala keteıik, Ýkraınada karantın 12 naýryzda engizilgen bolatyn.
