Ýkraınada qazir 4 avtobýs kepteliste tur, ár avtobýsta 40-50 Qazaqstan azamaty bar – Darhan Káletaev
«Áskerı áreketter ýshyǵyp bara jatyr, jolda keptelis. Erteń Ýkraına-Polsha shekarasyndaǵy bosqyndardyń sany mıllıonǵa jetpek. Shekaradaǵy jaǵdaıǵa kelsek, qazir bizdiń 4 avtobýs kepteliste tur. Ár avtobýsta 40-50 qazaqstandyq bar. Azamattarymyz mingen birinshi avtobýs Polshaǵa jetti, úlken avtobýs bolǵandyqtan onda 80 adam boldy», - dedi Darhan Káletaev.
Onyń aıtýynsha, qazaqstandyqtar mingen 2 avtobýs shekaraǵa taıap qaldy.
«Lvov qalasynan Kıevke taǵy 2 avtobýs otandastarymyz jetkizildi. Olar shekara kezeginde tur. Dıplomatııalyq baǵyt boıynsha tek dıplomatııalyq kólikterdi ǵana jiberip jatyr. Polıtseılerdiń qaraýyldaýymen qazaqstandyq dıplomatııalyq mıssııanyń 8 avtokóligi óte aldy. Al qazaqstandyqtar mingen avtobýstardy birge alyp shyǵý múmkin emes. Sebebi dıplomatııalyq emes kólikterdi qatań tekserip baryp jiberedi. Biz qazaqstandyqtardy shekaraǵa jetkizý úshin nómiri ýkraındyq avtobýstardy jaldadyq, olardy dıplomatııalyq baǵyt boıynsha shyǵarmaıdy. Biz sonda elshilik qyzmetkerleriniń otbasyn Ýkraınada qaldyryp ketýimiz kerek pe?» - deıdi ol.
Elshiniń málimetinshe, Ýkraınadan dıplomatııalyq baǵyt arqyly shyqqan kóliktiń ishinde 25 elshilik qyzmetkerleri otbasynyń 25 múshesi jáne 40 el azamaty bolǵan.